Lenjani feston bashkë me nxënësit e shkollës shqipe

Ylli i kombëtarës shqiptare Ermir Lenjani në mesin e fëmijëve futbollistë që nuk i ndanin sytë, ndau kupën e pavarësisë së Shqipërisë ekipit fitues me emrin „ Mos ma prek Flamurin“

Ky ekip  me këtë emër „provokues“ dhe kjo ndjenjë e freskët për Lenjanin që e kishte përjetuar në Beograd në mbrojtje të flamurit, ishte një rastësi që ai nuk e kishte menduar më parë.

„Mos ma prek flamurin“ ishte ekipi nxënësve të shkollës shqipe në Flums që fitoi të shtunën turnirin futbollistik të organizuar në Walenstadt nga LAPSH-i për nder të ditës së shpalljës së pavarësisë së Shqipërisë.

Në mesin e tetë ekipeve të paraqitura për pjesëmarrje në këtë turnir futbollistik mes nxënësve të të gjitha grupmoshave të mësimit plotësues në gjuhën shqipe, ishte edhe futbollisti i kombëtarës shqiptare, Ermir Lenjani.

Musafiri i madh tha se ndjehej mirë në mesin e fëmijeve, të cilit i vraponin gjatë gjithë kohës pas për të bërë një fotografi me të, për të marrë një autograf,  e për t’i qëndruar pranë lojtarit që tashme shihej se një yll i tyre.

Ermir Lenjani që luan sot me ekipin e tij FC St. Gallen ndaj FC Vaduz-it, në këtë manifestim për nder të 28 Nëntorit i nderoi bashkë me organizatorët futbollistet dhe futbollistët e rinj me nga një çmim e kupa të mëdha për finalistët.

Çmimin e lojtarës dhe lojtarit më të mirë morën  Ariona Murati  dhe Azem Sadiku. Kurse për Lenjanin, Vaxhid Sejdiu kishte rezervuar një mirënjohje si shenj kujtimi nga nxënësit e shkollës shqipe në Zvicër.

„Ky është një rast i mirë për të mbledhur bashkë fëmijë e prindër shqiptarë që jetojnë larg njëri tjetrit e të shpërndarë në vende të ndryshe në Zvicër“, vlerësoi Vaxhid Sejdiu, kryetar i LAPSH-it për kantonet Zvicrës lindore.