“LëvizAlbania”, takime në Gjenevë dhe Bernë

Një delegacion i “LëvizAlbania”, një projekt që synon nxitjen e demokracisë vendore në Shqipëri,  zhvilloi një vizitë zyrtare në Kantonin e Gjenevës në Zvicër.

Qëllimi i vizitës ishtë studimi dhe njohja nga afër e historive të suksesit nga institucionet e qeverisjes vendore në Gjenevë, njoftojnë mediat nga Tirana.

Delegacioni nga Shqipëria përbëhej nga drejtori i Fondacionit Shoqëria e Hapur për Shqipërinë, Andi Dobrushi, Juliana Hoxha, drejtore ekzekutive e Parterëve Shqipëri për Ndryshim dhe Zhvillim, Dritan Shutina, drejtor ekzekutiv i CO-Plan dhe Valbona Kuko, drejtore ekzekutive e projektit “LevizAlbania”.

Delegacioni nga Tirana u prit në një takim shumë frytdhënës nga Kryetari i Bashkisë së Gjenevës, Remi Pagany, i cili më 1 Qershor 2017 ka marrë detyrën e Kryetarit të Bashkisë së Kantonit të Gjenevës, përcjell albinfo.ch.

Takimi u fokusua në shkëmbimin e ndërsjellë të eksperiencave, sidomos në modelin e suksesshëm të organizimit të peticioneve dhe referendumeve lokale, për të cilat Zvicra njihet si histori suksesi.

Modeli zviceran i përdorimit të peticioneve dhe referendumeve që iniciohen nga nismat qytetare në raport me politikat vendore, investimet, transparenca, llogaridhënia dhe përfshirja qytetare në vendimmarrjet vendore, ka ndikuar drejtpërdrejtë në cilësinë e qeverisjes lokale.

Kryetari i Bashkisë Pagany, paraqiti përpara delegacionit të LëvizAlbania shëmbullin e tij konkret se si përmes angazhimit qytetar duke u mbështetur në të drejat që ligji i garanton, përpara se të merrte detyrën e kryebashkiakut, sëbashku me qytetarët e një zone në Gjenevë, arritën të transformonin një shesh të pashfrytëzuar dhe pamirëmbajtur në një shesh që sot përshkohet dhe shfrytëzohet nga 18 mijë banorë, vetëm duke shfrytëzuar mundësinë e peticionit dhe nismave qytetare.

“Projektet pasi hartohen shfaqen on-line për të marrë gjykimin e banoreve, ata më pas vendosin për ta pranuar ose jo. Në rast se ka kundërshti, banorët nisin rrugën e kontestimit dhe Këshilli Bashkiak duhet të shqyrtojë vendimin e tyre”, shpjegoi Pagany mënyrën e funksionimit të peticioneve në Kantonin e Gjenevës.

Ekipi i “LëvizAlbania” zhvilloi gjithashtu një takim me drejtuesit e Agjencisë Zvicerane për Zhvillim dhe Bashkëpunim në qytetin e Bernës, e cila financon dhe projektin për demokracinë vendore “LëvizAlbania”. Anetarët e Konsorciumit të LëvizAlbania prezantuan eksperiencën e organizatave të tyre (OSFA, Partners Albania & Co-Plan) në sektorët që operojnë prej shumë vitesh. Ata vlerësuan maksimalisht se bashkimi i ekspertizës së tre organizatave në zbatimin e projektit LëvizAlbania është një histori suksesi dhe ka nisur të japë efekte konkrete.