Liga Shqiptare në Austri përmbyllet me aktivitete sportive-kulturore

Klubi futbollistik “FC Timi” është shpallur kampion për vitin 2017, ndërsa titullin nën kampion 2017  e ka fituar ekipi “Deçani

Ka përfunduar kampionati i tetë i Ligës Shqiptare në Austri. Klubi futbollistik “FC Timi” është shpallur kampion për vitin 2017, ndërsa titullin nën kampion 2017  e ka fituar ekipi “Deçani”. Të dy këto ekipe ishin fituese me meritë pasi që gjatë të gjitha ndeshjeve kampionale treguan shumë cilësi në fushën e futbollit.

Pas përmbylljes së garave të këtij kampionati, në ceremoninë e organizuar për këtë qëllim, sportistë dhe aktivistë u nderuan dhe u dekoruan sipas vendimit dhe përzgjedhjes që kishte bërë kryesia, në mbledhjen e fundit, duke krahasuar meritat e tyre për këtë vit.

“Pos ekipeve që fituan tri vendet e para dhe që, përpos kupave që morën, ku lojtarët e tyre u nderuan edhe me medalje veç e veç, fituesit tjerë, sipas vendimit të kryesisë, janë ekipet, “Usaj” për “Fair play”,  “Palestina” për pjesëmarrje si ekip mysafir, “Afrim Zhitia” për angazhim gjatë shumë viteve në Ligën Shqiptare, ekipi “Besa” si ekip i ri në ligë, dhe ekipi “Krenaria” si ekip veteran dhe besnik i ligës, të themeluar që nga viti 2013”, thuhet në njoftim, përcjell “albinfo.ch”.

Si në çdo përmbyllje të kampionateve të futbollit, që tashmë tradicionalisht përmbyllen në mënyrë të organizuar me këngë e valle dhe në një ambient të përshtatshëm për komunitetin tonë, edhe këtë vit vazhduan bashkëpunimet për një organizim sportiv dhe kulturor.

“Këtë vit ishte ftuar shoqata „12 Qershori“, që tashmë  ka vite që kënaq zemrat e pjesëmarrësve në organizimet tona, të udhëhequr nga Rolanda Limani. Pos valleve në fushën e madhe sportive, nuk munguan as këngë folklorike, ku posaçërisht zëri i njomë i Albanit dhe çiftelia e tij tingëllojnë freskët dhe dëgjohen me shumë kënaqësi në mesin e bashkëkombësve tanë. Janë pikërisht këto shpresat e reja të kombit tonë, për të cilat Liga Shqiptare e Futbollit në Austri japë maksimumin, që të kenë një të ardhme të lidhur ngushtë me prejardhjen, doket, zakonet dhe kulturën tonë, që të bashkuar të kontribuojmë në gërshetimin dhe kultivimin e këtyre vlerave” potencohet në njoftim.

Në fund të njoftimit thuhet se në muajin nëntor do të organizohen garat e kupës, të cilat parashihen të janë edhe aktiviteti i fundit për vitin 2017