“Lufta” e shefit gjerman ka sukses: Vesel Fuga mund të qëndrojë në Gjermani!

Falë mbështetjes së shefit të tij, Jochen Thomann, më 29 dhjetor, Veseli do të mund ta festojë ditëlindjen e tij të 42-të për herë të parë pa frikën e dëbimit

Komisioni për raste të rënda i Ministrisë për Integrim ka sjellë vendimin e duhur dhe të pritur kaq gjatë: Vesel Fuga mund të qëndrojë në Gjermani. Leja e rregullt e qëndrimit për kosovarin 41 vjeçar për fillim jepet vetëm për një vit por me mundësinë e vazhdimit nëse ai nuk do të shkelë ligjin dhe nëse vazhdon të punojë e të mos bëhet barrë e enteve sociale, shkruan «schwarzwälderbote.de».

Me këtë vendim ka triumfuar drejtësia dhe sidomos këmbëngulësia e Jochen Thomann, shefit të punës të kosovarit.

Para një viti, gazetat gjermane, të transmetuara edhe nga albinfo.ch shkruanin keshtu për rastin:

“Shqiptari nga Kosova, Vesel Fuga punon prej disa vitesh në kopshtari në lokalitetin Bitz. Pas prishjes së kurorës me një shtetase gjermane, para dy vitesh, atij i është kërkuar ta lëshojë Gjermaninë. Por, shefi i Veselit, gjermani Jochen Thomann ka vendosur të luftojë deri në fund për ta mbajtur këtu punëtorin e tij më të mirë dhe shokun. Ai tashmë ka bërë disa ankesa nëpër gjykata shkallësh të ndryshme.

Së fundi Thomann i ka mbështetur shpresat te komisioni për peticione, i cili, shpreson ai, do t`ia japë të drejtën e qëndrimit në Gjermani punëtorit të tij të pazëvendësueshëm.

Nëse edhe komisioni vendos kundër Vesel Fugës, shefi i tij do të ankohet edhe në komisionin për raste të rënda për të huajt. “Fuga ndodhet nën një presion të madh psikik “ thoshte Jochen Thomann”.

Kjo ishte gjendja para rreth një viti. Tash, angazhimi i madh i gjermanit ka dhënë frytet e veta: punëtori i tij shembullor ka fituar lejen e qëndrimit në Gjermani, përcjell albinfo.ch gazetat gjermane.

Më 29 dhjetor, Veseli do të mund ta festojë ditëlindjen e tij të 42-të për herë të parë pa frikën e dëbimit.