“Lufthansa”, kompania më e mirë ajrore në Evropë

“Lufthansa” është përzgjedhur si “linja më e mirë ajrore në Evropë” në hulumtimin e Institutit për hulumtimin e tregut “Skytrax”, e specializuar në aviacion. Janë përfshirë në anketë rreth 18 milionë pasagjerë, nga 160 vende.

Udhëtarët nga e gjithë bota kanë mbështetur transportuesin gjerman, duke vlerësuar shërbimet e ofruara nga “Lufthansa”.

“Vlerësimi nga “Skytrax” është dëshmi se pasagjerët e “Lufthansa”-s e respektojnë cilësinë tonë. Kombinimi i shërbimit të klasit të parë dhe kapacitetet e shkëlqyera kanë impresionuar pasagjerët në mbarë botën që të bëhemi numër një në Evropë. Shërbimet tona nuk kanë qenë kurrë më të mira”, tha Carsten, kryetar i Bordit Ekzekutiv dhe CEO i “Deutsche Lufthansa AG”.

Pas marrjes së çmimit, ai tha se kjo ndodh në sajë angazhimit të veçantë të stafit të “Lufthansa”-s, të cilët me punën e tyre të shkëlqyer kanë bërë të mundshëm këtë sukses.

“Lufthansa” ka fituar edhe si “linja ajrore më e mirë në Evropën Perëndimore” dhe çmimin për “ushqimin më të mirë në klasin e parë”.
Të nominuar për çmimin në kategorinë “linjë ajrore më e mirë në Evropën Perëndimore” ishin “Lufthansa”, “Swiss” dhe „Austrian Airlines“. Kjo e fundit fitoi çmimin si “linja ajrore me stafin më të mirë në Evropë”.

Sondazhi i “Skytrax” ka vlerësuar shërbimet në bord dhe shërbimet në aeroporte. “Skytrax” realizon sondazhe të këtilla që nga 1999-a.