Luiza Gega pas humbjes: Ndihem e dështuar, dhemb shumë

Pas përmbylljes së garës nga Lojërat Olimpike të Parisit, atletja shqiptare, Luiza Gega, ka reaguar përmes një postimi në Instagram.

Ajo tha se ndjehet totalisht e dështuar pasi nuk siguroi dot finalen e atletikës në Lojërat Olimpike. Ish-kampionia e Evropës tregon se mori pjesë, edhe pse nuk ishte në gjendje të mirë fizike për shkak të problemeve që ka kaluar.

“Është kaq e vështirë të gjesh fjalë kur ndihesh totalisht e dështuar dhe në fakt në këto momente e tillë ndihem. E di që do kalojë, çdo gjë kalon me kohën, por në këtë moment dhemb shumë, sepse vërtet jam munduar dhe ëndërruar që do t’ia dal, pavarësisht se gjërat që në muajin prill, pasi u sëmura, morën “dishezën”.

Gjithsesi përsëri përpiqesha fort çdo ditë, edhe pse me shumë stres nga ndjesitë jo të mira të trupit tim, përsëri rrija me shpresën që do ta përballoja një garë të nivelit, por në fakt, nuk ndodhi kështu.

Edhe përse nuk e kam thënë, kam qenë në dilemë të madhe me veten nëse duhet të vija apo jo, por e di që pengu për të mos e provuar do të më lëndonte më shumë.

Dua vërtet i kërkoj falje kujtdo që besoi tek unë dhe e zhgënjeva dhe falënderoj të gjithë ata që më mbështesin si në ditë të mira, qoftë dhe të vështira. Endrra e Parisit mbyllet sot”, shkruan Luiza Gega.