Mandl: BE duhet të ndryshojë qasjen ndaj dialogut Kosovë-Serbi

Photo Credits: Buero

Bashkimi Evropian duhet të ndryshojë qasje ndaj dialogut mes Kosovës dhe Serbisë. Në një intervistë për A2 CNN në Kosovë, europarlamentari Lukas Mandle, i cilësoi si gabim historik masat ndaj Kosovës, ndërsa kritikoi punën e të dërguarit të posaçëm Miroslav Lajcak. Sipas tij Serbia është pala agresive, dhe është e gabuar që ndaj saj të merren gjithmonë vetëm masa simbolike.

“Mendoj se ndërmjetësimi i dialogut nga Bashkimi Evropian, duhet të jetë në përputhje me të gjithë partnerët pozitivë në mbarë botën, të cilët gjithashtu duhet të kontribuojnë për një të ardhme pozitive për Ballkanin Perëndimor. Dhe së dyti, duhet të jetë shumë transparent. Pra, ajo që do të prisja nga një i dërguar i posaçëm do të ishte që të udhëtonte gjatë gjithë kohës. Gjithashtu në të kaluarën kam rekomanduar që të shkojë një javë në Beograd, një javë në Prishtinë, e pastaj në Bruksel një javë për të raportuar dhe për të reflektuar. Dukej të ishte në lëvizje mes Beogradit, Prishtinës, dhe Brukselit, por edhe në zonat rurale, jo vetëm me kryeqytetet; për të ndërtuar ura. E kam fjalën për ura substanciale mes njerëzve, ndërmjet shoqërive, dhe në këtë mënyrë edhe për të ndihmuar nivelin politik, politikëbërjen. Kjo do të ishte e nevojshme për të arritur rezultate më të mira. Kjo është ajo që unë do të prisja nga një ndërmjetësim i mirë nga ana e BE-së”, tha ai.