Me energji për të ardhmen – Historia e Amirit në Zvicër

Historia e Amir Elezit është një prej atyre tregimeve që të kujtojnë se sukseset e diasporës nuk lindin rastësisht. Puna, këmbëngulja dhe lidhja e fortë me rrënjët janë shtyllat që e kanë udhëhequr atë në çdo hap. Në një kohë kur bota kërkon gjithnjë e më shumë energji të pastër, Amiri sjell një shembull të energjisë njerëzore që lë gjurmë.

 

Nga Kumanova në Marbach – rrënjë shqiptare, rritje zvicerane

Amiri ka lindur në Kumanovë, por fëmijërinë e ka kaluar në Marbach të Sankt Gallenit. Familja e tij u shpërngul në Zvicër në vitin 1993, kur shqiptarët ende shiheshin rrallë në zonat rurale.

“Shkolla, fqinjët, shokët – aty u njoha me kulturën zvicerane. Nuk kishte ndarje, nuk kishte ‘ne’ dhe ‘ata’. Ishte një komunitet që vlerësonte punën dhe ndershmërinë”, kujton ai.

Megjithëse nuk kishin shumë, familja e tij mbante fort parimin e solidaritetit. “Ato vite më formuan. Më dhanë themelet që mbaj sot, si në jetën private, ashtu edhe në profesion.”

Të jesh shqiptar – një vlerë që afron, jo që ndan

Amiri nuk e sheh prejardhjen e tij si pengesë, përkundrazi. Ai beson se ajo ka qenë një pasuri në kontaktet e tij me zviceranët.

“Jam rritur me vlera si respekti, uniteti dhe besnikëria. Në punë nuk je i vetëm, suksesi ndërtohet me njerëz me të cilët ndan besim e korrektësi.”

Rruga drejt energjisë së pastër nisi herët, me punën në instalime solare termike. Ngjarja që e shënoi më së shumti ishte katastrofa bërthamore e Japonisë në vitin 2011.

“E kuptova se njerëzimi nuk mund të mbështetet më në burime të rrezikshme. E ardhmja është energjia e ripërtëritshme.”

Projekti që i hapi horizontet

Një ndër projektet më të rëndësishme për të ishte instalimi i një sistemi fotovoltaik në qendrën tregtare të St. Margrethen – mbi 2.000 module, kompani të shumta të përfshira, punime me ndërprerje totale të energjisë.

“Sfida ishte enorme. Logjistika, koordinimi, përgjegjësia për çdo detaj… por aty mësova më shumë se kurrë. Kuptova se përgjegjësia nuk është barrë, është mundësi për rritje.”

Ky projekt shënoi fillimin e një kapitulli të ri – një udhëtim drejt inovacionit dhe lidershipit.

Die Energiegestalter AG – inovacioni në zemër të misionit

Sot, Amiri drejton kompaninë Die Energiegestalter AG, një nga emrat më të kërkuar në Zvicër për zgjidhje të personalizuara në fotovoltaikë, akumulim, E-Mobility dhe sisteme të qëndrueshme për ndërtime moderne.

“Ne nuk ofrojmë zgjidhje standarde. Çdo shtëpi, çdo biznes ka nevojat e veta. Ne krijojmë ide të personalizuara që sjellin efikasitet dhe qëndrueshmëri në plan afatgjatë.”

Për të, inovacioni është mënyrë jetese. “Detyra ime është të jem një hap përpara – të kuptoj tregun, të frymëzoj ekipin dhe të sjell zgjidhje të reja për ekonominë e gjelbër.”

Lidership përtej biznesit – JCI

Përveç menaxhimit të kompanisë, Amiri është aktiv edhe në Junior Chamber International (JCI). Ka shërbyer si President i JCI Rheintal dhe pastaj si EVP i Zonës 3 në Zvicër. Motoja e tij: “The Revival of the Rhine Valley”, një thirrje për ringjalljen e bashkëpunimit pas pandemisë.

“JCI më mësoi se lidershipi nuk është vetëm drejtim. Është frymëzim, bashkëpunim dhe përgjegjësi ndaj komunitetit.”

Diaspora dhe roli i brezit të ri

Si pjesë e gjeneratës së dytë të shqiptarëve në Zvicër, Amiri e vlerëson lart rolin e të rinjve në organizata dhe rrjete që ndërtojnë ura mes kulturave.

“Këto rrjete krijojnë besim, miqësi dhe mundësi. Jo vetëm për karrierë, por për jetë. Të rinjtë shqiptarë duhet të marrin pjesë, sepse aty mësojnë përgjegjësi dhe përgatiten për rolin e tyre në shoqëri.”

Ai beson fort në potencialin e diasporës shqiptare për të ndërtuar ura ekonomike dhe profesionale me vendet e origjinës.

“Zvicra funksionon falë unitetit dhe organizimit. Nëse këtë frymë e çojmë në vendet tona, nuk do të marrim vetëm – do të mësojmë edhe të japim. Lidhjet e shëndosha ndërtohen kur ka shkëmbim, kur merr dhe jep.”

 

---