Mehmedi e Shaqiri me shokë premtojnë ta bëjnë Zvicrën kampione

Në ndeshjen e sotme lojtari "strategu i lojës së qendrës" Granit Xhaka kthehet në skuadër pas mungesës së shkaktuar nga dy kartonët e verdhë

Sonte në orën 20.45  kombëtarja U21 e Zvicrës takohet me kombëtaren e Spanjës në ndeshjen finale të Kampionatit Evropian të futbollit që po zhvillohet në Danimarkë.

Mediet zvicerane i kushtojnë rëndësi të madhe kësaj ndeshjeje, në të cilën lojtarët e Zvicrës paraqiten me shumë vetëbesim, me gjithë faktin se kanë të bëjnë me një skuadër favorite siç është Spanja.

Ky vetëbesim nuk është i rastit. Përfaqësuesja zvicerane është e vetmja që në të katër ndeshjet e luajtuara deri më tash nuk ka pësuar asnjë gol, ndërkohë që ka shënuar 7 gola. Të kujtojmë se 4 nga këta gola i kanë shënuar lojtarët shqiptarë; Admir Mehmedi 3 dhe Xherdan Shaqiri 1.

Në ndeshjen e sotme lojtari që konsiderohet strateg i lojës së qendrës Granit Xhaka pritet të kthehet në skuadër pas mungesës së shkaktuar nga dy kartonët e verdhë. Dhe, per t`i lënë Xhakës vendin e titullarit, mediet supozojnë se Xavier Hochstrasser do të duhej të kthehet në bankën e rezervistëve.

Përzgjedhësi i përfaqësueses zvicerane Pierluigi Tammi ka thënë për medeiet e këtushme se ndjehet i lumtur që mund të angazhojë sërish “lojtarin kyq, Granit Xhakën. Xhaka ka treguar lojë shumë të mirë në dy ndeshjet e para kështu që është lojtar shumë i rëndësishëm për ne”.

Është interesante pozita e Mehmedit në skuadër. Ndonëse ai kishte hyrë vetëm si zëvendësim i kroatit Gavranoviç, dy golat e shënuar në një ndeshje e bëjnë atë të padiskutueshëm në ndeshjet vijuese. Po ashtu i padikutueshëm është edhe vendi titullar i yllit të kombëtares zvicerane Xherdan Shaqirit.

Ndërkaq dy shqiptarët tjerë të përfaqëueses zvicerane: Abrashi dhe Kasami mund të shpresojnë që të futen në lojë si zëvendësime të lojtarëve titullarë.

Ndeshja e sontme do të tregojë se kujt do t`i takojë kurora e Kampionit Evropian. bazuar në nivelin e treguar në këtë kampionat si dhe entuziazmin që e karakterizon, përfaqëuesja e Zvicrës fare lehtë mund ta befasojë Spanjën favorite.