Melisë Sejdiu dhe Rea Hadri pranohen në Universitetin e Pittsburghut

Dy studente nga Kosova sigurojnë bursë rreth 70 mijë dollarë për studime master në SHBA pas suksesit në “Vis Moot”

Dy studente nga Kosova, Melisë Sejdiu dhe Rea Hadri, kanë shënuar një arritje të rëndësishme akademike duke u pranuar në studimet master në Universitetin e Pittsburghut në Shtetet e Bashkuara të Amerikës, me bursë të plotë në vlerë rreth 70 mijë dollarë, transmeton albinfo.ch.

Ky sukses vjen pas performancës së tyre të jashtëzakonshme në garën ndërkombëtare “Vis Moot”, ku në vitin 2024 u renditën në vendin e tretë në nivel botëror, duke përfaqësuar Kosovën në një nga kompeticionet më prestigjioze në fushën e së drejtës.

Pranimi në një universitet të njohur amerikan dhe sigurimi i bursës së plotë konsiderohet një arritje e madhe, që dëshmon përkushtimin, talentin dhe punën e palodhur të dy studenteve.

Ky zhvillim shihet gjithashtu si një shembull frymëzues për të rinjtë në Kosovë, duke dëshmuar se me angazhim, disiplinë dhe rezultate konkrete, mundësitë për avancim akademik dhe sukses ndërkombëtar janë të arritshme./Albinfo.ch

---