Merdar, deri në tri orë pritje për të hyrë në Kosovë

Me orë të tëra janë duke pritur mërgimtarët nëpër pikat kufitare

Është bërë e ditur se edhe sot mërgimtarët, të cilët po vijnë nga Evropa në Kosovë për festat e fundvitit, po presin me orë të tëra nëpër pikat kufitare, shkruan albinfo.ch.

Sipas informacioneve të fundit nga “Qendra Kombëtare për Menaxhim Kufitar”, thuhet se vetëm në pikën kufitare në Merdar radhët e pritjes kanë shkuar deri në 1.5 kilometra, ndërsa duhen më shumë se tri orë për të hyrë në Kosovë.

Po ashtu, pritje vihen re edhe në pikën kufitare në Muçibabë, pasi radha është 1.2 kilometra, ndërsa pritja shkon deri në dy orë.

Nga ana tjetër, në pikën kufitare Dheu i Bardhë pritjet janë më të pakta, shkojnë deri në 40 minuta.

Ndërkohë në Jarinje dhe Mutivodë qytetarët presin deri në 15 minuta për të hyrë në Kosovë. /Albinfo.ch.

 

---