Mërgimi që krijon nga mërgimi

Autori jeton tash e shumë vjet në Vjenë të Austrisë

Poeti prizrenas, Mërgim Osmani, e sfidon veten tani edhe në prozë, edhe atë përmes tregimeve të shkurtra. Pas tri përmbledhjeve me poezi, ai sjell para lexuesve përmbledhjen e tij të parë me tregime, të titulluar “Sykaltra”. Ky libër përmbledh 18 tregime të ndryshme, kryesisht me ndodhi nga vendlindja e tij, Randobrava e Prizrenit. Autori jeton tash e shumë vjet në Vjenë të Austrisë, dhe në tregimet e tij ai tregon, aty-këtu, ndoshta në një formë të thjeshtë, por të dhimbshme, nostalgjinë dhe lidhjen e tij të vazhdueshme me vendin e lindjes. Ai tregon për ngjarjet dhe ndodhitë që i kanë ndodhur në fëmijërinë e tij, apo që i ka të dëgjuara nga më të vjetrit.

Këtë libër e botoi shtëpia botuese “Fishta” nga Prishtina, ndërsa shtypin e bëri shtypshkronja “Lena Grafik”, po ashtu nga Prishtina.

Parathënien e ka shkruar znj. Bardha Mançe nga Greqia  e cila ndër të tjera shprehet: “Mërgim Osmani na vjen në këtë vëllim i rritur cilësisht, i vendosur dhe plot pretendime për realizime sa me vlerë njohëse nëpërmjet vëzhgimit dhe qëmtimit të realitetit, aq edhe filozofike, nëpërmjet analizave, sintezave të mendimit që përcjell këtë realitet në forma të këndshme dhe të besueshme artistike. Një vështrim në formë të pasthënies e ka bërë poeti Zef Ndrecaj, i cili shkruan: “Në të gjitha këto tregime gjithmonë vihet në pah qëndrimi i autorit mbi çështjen kombëtare, dhe ai ka kufi të prerë në qëndrimin e tij, mbi etninë dhe gjenin e tij. Këtë ai e dëshmon shumë mirë, sidomos në qëndrimin e tij rreth rrëfimëve mbi Mamushën, Randobravën, në tregimin për Hoqën e Madhe etj.”

Ndryshe, Mërgim Osmani është anëtar i Lidhjes së Shkrimtarëve dhe Krijuesve Shqiptarë në Austri “Aleksandër Moisiu”, me seli në Vjenë, dhe është aktiv në aktivitetet e ndryshme kulturore dhe letrare që bëhen në Austri.