Mërgimtari nga Suedia bën me shtëpi një familje në Malishevë

Kësaj familje ju kanë dorëzuar çelësat e shtëpisë, e cila është ndërtuar falë donatorit Halim Hoti, përmes shoqatës humanitare “Ndihmo edhe Ti”

Mërgimtarët vazhdojnë të kontribuojnë në forma të ndryshme në Kosovë, duke ndihmuar në mënyra të ndryshme, shkruan albinfo.ch.

Falë shoqatës bamirëse “Ndihmo edhe Ti”, me donator Halim Hotin nga Carralluka, i cili jeton dhe vepron në Suedi, dhe Komunës së Malishevës, familja e Musaj dhe Bukurie Kastratit nga Turjaka, përfundimisht e kanë të zgjidhur problemin e banimit, pasi janë bërë me shtëpi të re.

Kësaj familje ju kanë dorëzuar çelësat e shtëpisë, e cila është ndërtuar falë donatorit Halim Hoti, përmes shoqatës humanitare “Ndihmo edhe Ti”.

Shoqata e ka ndërtuar pjesën e mureve dhe meremetimin e brendshëm, ndërsa kulmin e shtëpisë e ka ndërtuar Komuna e Malishevës, në mënyrë që kjo familje të ketë një strehë normale për jetesë.

“Liridon Llapashtica, drejtor i shoqatës, ka thënë se kjo shtëpi, sikur edhe shumë të tjera, janë ndërtuar falë donatorit Halim Hoti, të cilin e ka falënderuar për këto donacione, si dhe falë bashkëpunimit të mirë me Komunën e Malishevës. “Ne do të jemi, gjithmonë aty ku është nevoja dhe falë këtyre donacioneve dhe këtyre bashkëpunimeve me komuna, apo institucione tjera, do t’iu dalim në ndihmë familjeve që kanë nevojë”, ka thënë Llapashtica”, thuhet në njoftimin e Komunës së Malishevës.

Familja Musaj dhe Bukurie Kastratit, janë katër anëtarë, ndërsa për shumë kohë, kanë qenë pa shtëpi, mirëpo tani ata e kanë zgjidhur përfundimisht problemin e banimit.