Lucern: Rreth 100 vende pune pritet të shkurtohen në Schurter

Rreth 100 vende pune në selinë qendrore rrezikohen si pjesë e ristrukturimit global dhe orientimit drejt tregjeve Azi-Paqësor dhe Amerikë

Prodhuesi zviceran i elektronikës Schurter ka njoftuar një plan të gjerë për shkurtimin e vendeve të punës në selinë e tij qendrore në Lucern, përcjell albinfo.ch.

Sipas njoftimit të kompanisë, deri në fund të vitit 2027 do të reduktohen rreth 100 nga afro 300 vendet aktuale të punës në këtë lokacion, që përbën rreth një të tretën e stafit.

Kompania ka bërë të ditur se ky vendim lidhet me një riorientim strategjik drejt tregjeve dhe klientëve në rajonet me rritje më të shpejtë, veçanërisht në Azi-Paqësor dhe në Amerikë. Në kuadër të kësaj strategjie, Schurter do të ristrukturojë organizimin e saj në nivel global.

Sipas planit, funksionet administrative do të racionalizohen, ndërsa disa pozita do të zhvendosen në qendra kompetence në lokacione të tjera. Po ashtu, proceset e prodhimit që ndikohen ndjeshëm nga kostot do të transferohen në rajone që ofrojnë një raport më të favorshëm kosto–përfitim.

Me këtë hap, kompania synon të forcojë konkurrueshmërinë ndërkombëtare dhe të përqendrohet më shumë në teknologji me vlerë të lartë dhe komponentë kyç, ndërsa e ardhmja e një pjese të punonjësve në Luzern mbetet e pasigurt. /Albinfo.ch

---