Kuriozitete

Mesazhi i padërguar në telefon pranohet si testament 

55-vjeçari kishte shkruar një mesazh në të cilin i ishte adresuar vëllait duke thënë se “do t’i lë gjithçka që kam ty dhe nipërve

Një gjykatë në Australi ka pranuar një mesazh të padërguar në telefonin e një të vdekuri si testament zyrtar. 

55-vjeçari kishte shkruar një mesazh në të cilin i ishte adresuar vëllait duke thënë se “do t’i lë gjithçka që kam ty dhe nipërve”. 

Mesazhi u gjet në folderin ‘drafts’ në telefonin e personit, një vit pas vdekjes së tij. 

Gjykata Supreme e Brisbanet vendosi që shkrimi i tekstit ishte pikërisht në përshtatje me atë që dëshironte i ndjeri, shkruan albinfo.ch. 

Në mesazh, burri kishte dhënë detaje për fëmijët se si t’i qaseshin llogarisë së tij bankare dhe ku kishte fshehur paratë në shtëpi. “Vendosni hirin tim në kopshtin prapa”, kishte shkruar ai. “Ka pak para prapa TV-së dhe pak në bankë”. 

Sipas ABC News, gruaja e këtij burri kishte apeluar që të menaxhonte gjithçka që kishte lënë burri duke thënë se teksti nuk ishte valid si testament sepse nuk ishte dërguar kurrë. 

Gjyqtarja Susan Brown deklaroi se mesazhi, që përfundoi me fjalët “Testamenti im” dëshmoi se ky mesazh ishte testament.