Mijëra shtetas të Maqedonisë shkojnë në Shqipëri për fundjavë

@pixabay

Vijon të jetë i lartë numri i hyrje-daljeve nga pika e kalimit kufitar të Qafë Thanës. Burime zyrtare bëjnë me dije se gjatë 24 orëve të fundit në të dyja anët e kufirit me vendin fqinj kanë hyrë dhe kanë dalë 4.880 shtetas.

Numri më i lartë, sipas burimeve zyrtare, është regjistruar në hyrje nga vendi fqinj në vendin tonë, me 2.646 shtetas. Ndërkohë që kanë dalë nga Shqipëria drejt Maqedonisë së Veriut 2.234 shtetas.

Numri i lartë i hyrjeve drejt vendit tonë tregon se shqiptarët e Maqedonisë së Veriut kalojnë fundjavën në Shqipëri. Në kushte të tilla, për të përballuar edhe fluksin e lartë të hyrje-daljeve, policia kufitare ka shtuar numrin e sporteleve në Qafë Thanë, duke e çuar në 5 numrin e sporteleve në hyrje dhe dalje. Pala maqedonase punon me 4 sportele në hyrje dhe në dalje.

Ndërkohë një pjesa e madhe e shtetasve, të cilët dalin nga pika e kalimit kufitar të Qafë Thanës, vijojnë të përdorin Maqedoninë e Veriut si vend tranzit për të kaluar në Greqi, aty ku një pjesë e mirë e tyre jetojnë dhe punojnë.

Nga ana tjetër, gjatë 24 orëve të fundit kanë hyrë e kanë dalë nga pika e kalimit kufitar të Kapshticës 626 shtetas, ku 338 kanë hyrë drejt vendit tonë dhe 288 shtetas kanë dalë nga vendi ynë drejt shtetit helen. Rikujtojmë që kjo pikë e kalimit kufitar është rihapur vetëm për punonjësit sezonalë 1 javë më parë, shkruan VizionPlus, transmeton albinfo.ch.