Milani nuk heq dorë nga Rashica

(KEYSTONE/DPA/Matthias Balk)

Skuadra e Milanit nuk ka hequr dorë nga transferimi i sulmuesit të Kosovës, Milot Rashica. “Calciomercato” ka raportuar të enjten se skuadra nga Serie A po synon që në fund të këtij edicioni të sigurojë shërbimet e Rashicës.

Mësohet se Milani së shpejti do të nisë negociatat me Werder Bremenin në lidhje me çështjen e 24-vjeçarit, për të cilin ekipi gjerman po kërkon të paktën 15 milionë euro dëmshpërblim. Rashica pritet të largohet nga Werderi këtë verë pasi ekipi gjerman nuk e liroi atë në dy afatet e fundit kalimtare. Ai ka kontratë me Werderin deri në vitin tjetër, kurse këtë edicion ka pasur telashe me lëndime dhe ka dhjetë paraqitje e dy asistime në të gjitha garat.