Ministri serb, Vulin: Sa më shpejt duhet të ndahemi nga shqiptarët

Foto- Facebook

Ministri serb i Mbrojtjes ,Aleksandar Vulin, thotë se angazhohet që sa më shpejt të vendoset kufiri ndërmjet shqiptarëve të Kosovës e Serbisë.

“Pasi të konfirmojmë se ku është kufiri, atëherë edhe mund ta mbrojmë atë”.

Kështu ka thënë Vulin për gazetën e Beogradit “Veçernje Novosti”, pa treguar se kufiri ndërmjet Kosovës e Serbisë ka ekzistuar edhe më herët dhe ekziston gjithnjë edhe tash, me vendkalime kufitare ndërmjet dy vendeve e me roje ushtarake policore, po ashtu në të dy anët e kufirit, transmeton koha.net, përcjell albinfo.ch.

Në këtë intervistë të gjatë, ai shqiptarët e Kosovës i ka quajtur me termin “shiptari”, ndërsa ka paralajmëruar edhe rrezikun, siç ka thënë ai, nga krijimi i Shqipërisë së Madhe.

“Shqipëria e Madhe tashmë është krijuar. Çështje është se sa pjesë të shteteve të tjera do të përfshijë. Me hyrjen e Maqedonisë së Veriut në NATO, të gjithë shqiptarët, me përjashtim të dy komunave në Serbi, do të jetojnë në një zonë unike të sigurisë dhe në hapësirën politike në kuadër të NATO-s. E me jetën e të gjithë shqiptarëve udhëhiqet nga Tirana”, ka theksuar ai.

Duke folur për ndarjen, Vulin thotë se në rast të kësaj zgjidhjeje, ajo duhet konfirmuar me referendum.

“Disa fuqi të mëdha do të përkrahnin ndarjen, disa jo, ne duhet të marrim pjesë në këtë përballje”, thotë Vulini.

Lidhur me konstatimin se në rast të ndarjes, shumë serbë do të mbeteshin në Kosovën e pavarur, Vulin thotë: ”Unë s’e kam vizatuar kufirin, unë vetëm dua të ndahem nga shqiptarët e Kosovës”.

“Mendoj se ndarja është zgjidhja më e mirë. Nëse ndahemi nga shqiptarët, pas marrëveshjes, do të kishim më shumë mundësi t’i ndihmonim serbët që jetojnë në hapësirën me shumicë shqiptare se sa që kemi tash mundësi t’i ndihmojmë ata në hapësirat me shumicë serbe në Kosovë”, ka theksuar ai.

Sipas tij, konflikti me shqiptarët e Kosovës nuk është dhe nuk mund të jetë konflikt i ngrirë.

“Sa më shpejt që largohemi nga shqiptarët, aq më shpejt do të fillojmë së jetuari. Nëse nuk duam, atëherë me fat Kosova e tërësishme e me pavarësi”, ka thënë Vulin.