Ministrinë e Diasporës e vizitojnë intelektualët gjermanë

Siç njofton ministria, ky delegacion shoqërohej nga mësuesja e mësimit plotësues të gjuhës shqipe në Gjermani, Shqipe Gara Berisha

Një delegacion gjerman i përbërë nga intelektualë të fushave të ndryshme ka vizituar Ministrinë e Diasporës, ku është takuar me ministrin Valon Murati, raporton albinfo.ch.

Siç njofton ministria, ky delegacion shoqërohej nga mësuesja e mësimit plotësues të gjuhës shqipe në Gjermani, Shqipe Gara Berisha.

Mësohet se qëllimi i vizitës së tyre ishte njohja e Kosovës, por edhe shkëmbimi i kulturave, i përvojave  mes bashkatdhetarëve tanë në diasporë dhe vendit pritës, në këtë rast popullit gjerman.

“Në këtë takim u bisedua për shumë çështje që prekin komunitetin shqiptar në Gjermani, por edhe për historinë e Kosovës, për mundësitë që të rritet bashkëpunimi, veçanërisht për rolin e diasporës mes vendit tonë dhe shtetit gjerman”, thuhet në njoftimin e ministrisë.

Në fund të takimit, mësuesja Shqipe Gara Berisha tha se imazhi që ka krijuar diaspora shqiptare, ka ndikuar që këta njerëz të shprehin dëshirë ta njohin nga afër Kosovën dhe historinë e saj.