Lajme

Mocioni i Përparim Avdilit u mundëson të rinjve natyralizimin falas në nivel komunal

"Për personat nën 25 vjeçarë kjo taksë deri më tani ka qene 250 franga. Tani e kemi hequr komplet", thotë Avdili për albinfo.ch

“U deshën pothuajse dy vjet që mocioni i bërë nga Nadia Huberson, Isabel Garcia, Marcel Bührig, Shaibal Roy dhe unë, të dilte në debat. Dhe pikërisht për këtë, kënaqësia është më e madhe kur shohim se një shumicë e qartë (99  pro dhe 18 kundër) ka vendosur sot të heqë taksat e qytetit për natyralizim për të rinjtë deri në moshën 25 vjeçare.

Një pengesë e rëndësishme më pak dhe një gëzim më shumë. Edhe një herë, bashkëpunimi i shkëlqyeshëm jopartiak midis PS, FDP, GLP dhe të Gjelbërve përmes Secondas Zürich po jep fryte. Shumë faleminderit!”.

Këtë postim e ka publikuar pak më parë në llogarinë e tij në facebook Përparim Avdili, këshilltar (asamblist) në Parlanentin e Qytetit të Cyrihut, shkruan albinfo.ch.

Pjesa e taksës për natyralizim, ajo që paguhet në nivel komunal, është përmendur shpeshherë si pengesë për natyralizimin e të rinjve, të cilët, të shumtën e rasteve, nuk kanë mundësi ta paguajnë, shkruan albinfo.ch. Për pasojë, edhe kur i plotësojnë të gjitha kushtet, ata mbeten pa pasaportën zvicerane.

“Për personat nën 25 vjeçarë kjo taksë deri më tani ka qenë 250 franga. Tani e kemi hequr komplet, sepse të rinjtë ndodh shpesh të mos i kenë këto mjete. Por, krahas kësaj, ne e kemi ndërmarrë këtë mocion sidomos për t`u treguar të rinjve se janë të mirëseardhur që të bëhen zviceranë”, thotë Përparim Avdili për albinfo.ch

Përparim Avdili në parlamentin e qytetit më të madh të Zvicrës përfaqëson Partinë Liberale (FDP). Ai është shqiptari i parë dhe ende i vetëm në këtë nivel.

Avdili edhe më parë është dalluar me aktivitetin e tij në Parlamentin e Cyrihut. Pothuaj një vit më parë, ai, në krye të një grupi asamblistësh, pati udhëhequr një iniciativë parlamentare që qyteti i Cyrihut të mbështeste Shqipërinë, pas tërmetit shkatërrues të 26 nëntorit 2019. Inicativa e tij ishte miratuar në parlament dhe në këtë mënyrë qyteti i Cyrihut është solidarizuar me të dëmtuarit nga tërmeti, duke dhënë një ndihmë me vlerë prej 100 mijë frangash.


LAJME INTERESANTE NGA INTERNETI