Natalie Rickli kritikohet si “zëdhënëse e Blocher-it”

Rickli, siç shkruan “BaZ” ka marrë këtë post vetëm në saje të një manovre të Blocherit dhe Mörgelit

Deputetja nacionale nga radhët e SVP-UDC-së, Natalie Rickli shihet me mosbesim nga ana e një pjese të partisë së saj. Një numër përfaqësuesish të SVP-UDC-së në parlament e konsiderojnë atë, thjesht, “Altoparlant të Blocherit”. Por, kritikët flasin vetëm me kusht anonimiteti, shkruan gazeta Basler Zeitung. Ajo për çfarë kolegët e saj ia shohin për të madhe znj. Rickli është zgjedhja e saj si nënkryetare e grupit parlamentar të partisë. Rickli, siç shkruan “BaZ” ka marrë këtë post vetëm në saje të një manovre të Blocherit dhe Mörgelit. Nga ana tjetër vetë Rickli ka shkruar në facebook se kolegët e saj kritikë janë “të sëmurë” meqë po përhapin në opinion çështje të tilla të brendshme.

Nënkryetarja e re mezi e zgjedhur në këtë post, sipas asaj që kanë deklaruar për gazetën “Dere Sonntag” disa deputetë të partisë së saj, nuk gëzon simpati në grupin parlamentar. Dhe, ky qëndrim ndaj saj është sipas tyre një shprehje rebelimi kundër Blocherit.