Kirurgët shqiptarë bashkohen: Prof. Dr. Alban Neziri përfaqëson Zvicrën

Më 6–7 shkurt në Tiranë u mbajt takimi themelues i Kolegjit Pan-Shqiptar të Kirurgëve (KPSHK), me pjesëmarrjen e kirurgëve dhe delegatëve nga të gjitha trevat shqiptare dhe nga mërgata. KPSHK synon të shërbejë si platformë gjithëshqiptare e bashkëpunimit dhe koordinimit profesional në fushën e kirurgjisë.

Takimi u hap nga Prof. Dr. Arben Beqiri, kryesues mikpritës i Këshillit Themelues, ndërsa fjalimin prezantues e mbajti Prof. Dr. Rifat Latifi, kryesues i Këshillit Themelues.

Fjalë përshëndetëse mbajtën zv. kryeministri i parë i Maqedonisë së Veriut Dr. Bekim Sali, ministri i Shëndetësisë i Republikës së Kosovës Dr. Arben Vitia, ministri i Shëndetësisë i Maqedonisë së Veriut z. Azir Aliu, si dhe rektorët Prof. Dr. Xheladin Draçini (Universiteti i Mjekësisë, Tiranë) dhe Prof. Dr. Jusuf Zejneli (Universiteti i Tetovës), si dhe Prof. Dr. Mentor Petrela.

Në emër të përfaqësuesve nga rajoni dhe mërgata, fjalë përshëndetëse mbajtën edhe anëtarët e Këshillit Themelues, ndër ta Prof. Dr. Alban Neziri (Zvicër), i cili përfaqësoi kirurgët shqiptarë në Zvicër, përkatësisht Lidhjen e Mjekëve Shqiptarë në Zvicër (LMSHZ), duke theksuar rëndësinë e bashkëpunimit profesional ndërmjet kirurgëve shqiptarë brenda dhe jashtë trojeve shqiptare.

Përshëndetje mbajtën edhe Dr. Osman Zhuri (Kosovë), Prof. Dr. Ilir Hasani (Maqedoni e Veriut), Prof. Dr. Lumnije Kqiku (Austri), Prof. Dr. Mentor Ahmeti (SHBA), Dr. Valon Baraliu (Gjermani), Prof. Dr. Albion Totsi (Greqi), Dr. Daut Gjoni (Mali i Zi) dhe Dr. Beqir Nuhiu (Preshevë).

Anëtarë të tjerë të Këshillit Themelues të KPSHK-së janë edhe Prof. Dr. Arben Gjata, Prof. Dr. Fatos Olldashi, Dr. Edvin Selmani (Shqipëri), Prof. Asoc. Dr. Luan Jaha, Dr. Mentor Gorani (Kosovë), Dr. med. Kushtrim Shala (Gjermani), Prof. Dr. Rexhep Selmani (Maqedoni e Veriut), Prof. Dr. Ilirijana Haxhibeqiri (Bosnje dhe Hercegovinë) dhe Prof. Dr. Albion Totsi (Greqi). Koordinator i takimit ishte z. Kujtim Salihu.

Në përfundim, Prof. Dr. Rifat Latifi lexoi Rezolutën e Themelimit të KPSHK-së, e cila u miratua unanimisht nga delegatët. Në rezolutë thuhet se KPSHK do të funksionojë si entitet profesional i pavarur, me mision avancimin e praktikës dhe shkencës kirurgjikale, përcaktimin e standardeve të trajnimit, sigurimin e kujdesit kirurgjikal të sigurt dhe modern, si dhe promovimin e edukimit të vazhdueshëm dhe etikës profesionale.

Strukturat e përkohshme të Kolegjit do të përgatisin statutin dhe dokumentacionin themelues, ndërsa pas miratimit të statutit nga kuvendi i delegatëve do të zgjidhen strukturat drejtuese me mandat të plotë.

Më shumë për lajmin: Kirurget

lexoni po ashtu

Prof. Dr. Alban Y. Neziri themelon qendrën moderne të gjinekologjisë në Langenthal