Lajme

Panik në linjën e trenit Cyrih – Vjenë: 800 pasagjerë mbesin për 4 orë të bllokuar

Rreth 800 pasagjerë mbetën të bllokuar për orë të tëra të dielën në trenin Railjet 161, në linjën Cyrih – Vjenë. Pritja e gjatë për pasagjerët krijoi panik të madh

Asgjë nuk shkoi si duhet gjatë një udhëtimi me tren nga Cyrihu për në Vjenë.

Menjëherë pas ndalesës së planifikuar në stacionin e Linz, treni u ndal papritur dhe nuk mund të vazhdonte udhëtimin. Arsyeja ishte një defekt teknik. Kështu kanë konfirmuar zyrtarët e ÖBB-së për krone.at, përcjell albinfo.at.

Dyert mbetën të mbyllura dhe pas një kohe të shkurtër ka dështuar edhe klimatizimi.

Treni ka mbetur i bllokuar për më shumë se katër orë dhe te pasagjerët është krijuar një panik i madh. Tre persona janë lënduar dhe më pas janë dërguar për në spital, edhe pse nuk dihen arsyet.

Për katër orë, teknikët e ÖBB-së u përpoqën të nisnin trenin përsëri. Megjithatë, kjo nuk funksionoi, transmeton albinfo.at.

Përfundimisht pasagjerët u zhvendosën në një tren tjetër dhe mund të vazhdonin udhëtimin e tyre.


LAJME INTERESANTE NGA INTERNETI