Në Gjermani rritet lehtë shkalla e infektimit me koronavirus

Keystone Foto: Felix Kästle/dpa +++ dpa-Bildfunk +++

Autoritetet gjermane raportuan për rritje të lehtë të nivelit të riprodhimit të virusit.

Instituti Robert Koch tha të martën se niveli i riprodhimit është rritur nga 0.9 sa ka qenë së voni në 1.0.

Çdo shifër nën 1 nënkupton se virusi është duke rënë, ndërsa gjithçka mbi 1 do të thotë se po rritet.

Në fillim të marsit, niveli i riprodhimit ka qenë 3.0, ndërsa më 8 prill ka qenë 1.3.

Instituti Robert Koch për sëmundje infektive tha të martën se ka regjistruar edhe 1,144 raste të reja me koronavirus, që e rrisin në 156,337 numrin e përgjithshëm të të infektuarve në Gjermani.

Sipas burimit të njëjtë, numri i viktimave u rrit për 163, në 5,913.

Kur ka njoftuar për lehtësimin e masave të izolimit, kancelarja gjermane, Angela Merkel, e ka bërë të qartë se edhe ndryshimi më i vogël në nivelin e riprodhimit të virusit mund ta ndikojë përgjigjen e qeverisë.

Gjermania, edhe pse ka numër të madh të të infektuarve, ka numër më të vogël të viktimave krahasuar me vendet tjera evropiane: Italinë, Spanjën, Francën dhe Mbretërinë e Bashkuar – secila me mbi 20,000 të vdekur.

Suksesi relativ i Gjermanisë në trajtimin e koronavirusit u është atribuar kryesisht testimeve masive, përcjell Albinfo.ch.