Në Këshillin e Evropës diskutohet për Kosovën

Delegacioni i Kuvendit të Kosovës në Asamblenë Parlamentare të Këshillit të Evropës në përbërje: Xhavit Haliti, Aida Derguti, Srdjan Mitroviq, Ismet Beqiri, Mufera Sinik dhe Gani Dreshaj, po merr pjesë në Sesionin e Dytë të Rregullt dhe në mbledhjet e komisioneve të kësaj asambleje.

Aty është diskutuar për situatën në Kosovë dhe rolin e Këshillit të Evropës, ku në raportim ishin të ftuar Avokati i Popullit të Kosovës, Hilmi Jashari dhe Komisioneri për Gjuhët, Slavisa Mladenoviq. 

Në fokus të raportimit ishte infrastruktura ligjore për të drejtat e njeriut; të arriturat, vështirësitë, si dhe implementimi i përdorimit të gjuhëve të minoriteteve në institucionet e Kosovës, përcjell albinfo.ch.

Pjesëmarrës në diskutim ishin edhe anëtarët nga Britania e Madhe, Serbia dhe Kosova. 

Por, në këtë takim nuk ishte prezent raportuesi për Kosovën, deputeti nga Spanja, Jardi Roca Mas. Për mosprezencën e tij pati vërejtje nga anëtarët e këtij komisioni.

Kryetarja e Komisionit, Ria OOMEN-RUIJTEN, u zotua se në Sesionin e Tretë të Rregullt që do të mbahet më 24-28 qershor 2019, do të vijë me një sugjerim për bashkëpunim më të mirë në mes të delegacionit të Kosovës dhe të Serbisë.