Në këtë shtet flamujt do të vendosen edhe nëpër klasa

Kritikët e kanë cilësuar këtë ligj si tejet nacionalist dhe se, mjafton që të vendosen në shkolla

Shkollave në Francë u kërkohet tani të shfaqin flamurin francez dhe atë të Bashkimit Evropian në klasa, krahas fjalëve të himnit kombëtar.

Ky vendim – efektiv nga fillimi i vitit të ri shkollor të hënën – është miratuar nga Parlamenti në kuadër të reformave në arsim, në muajin shkurt, raporton Radio Evropa e Lirë.

Ai është sugjeruar nga deputetët e opozitës, por është miratuar nga qeveria e Presidentit francez Emmanuel Macron, përcjell albinfo.ch.

Atëbotë, ministri i Arsimit, Jean-Michel Blanquer, ka thënë se “fryma qytetare duhet të forcohet” dhe se njohuria për simbolet e vendit është një gjë e natyrshme në botë.

Me vendimin e ri, të gjitha klasat e shkollave fillore dhe të mesme duhet të shfaqin flamurin kombëtar, fjalët e himnit Marseillaise dhe moton kombëtare: “Liberté, Égalité, Fraternité” (Liri, Barazi, Vëllazëri).

Por, kritikët e kanë cilësuar këtë ligj si tejet nacionalist.

Michel Larive, deputet në Parlamentin e Francës, ka thënë se mbajtja e flamurit kombëtar jashtë shkollave është e mjaftueshme për të treguar “respektin për atdheun, pa rrëshqitur drejt nacionalizmit”.

---