Në Zvicër ka vazhduar importi i arit rus, edhe në qershor

Konkretisht, sipas një deklarate zyrtare, sasia e importuar e arit rus në Zvicër ishte 3089 kilogramë në maj dhe 284 kilogramë në qershor

Sipas Zyrës Federale për Doganat dhe Sigurinë Kufitare (BAZG), në maj dhe qershor të këtij viti në Zvicër është importuar ar me origjinë ruse nga Britania e Madhe, transmeton albinfo.ch. Konkretisht, sipas një deklarate zyrtare, sasia e importuar e arit rus në Zvicër ishte 3089 kilogramë në maj dhe 284 kilogramë në qershor.

Këto importe janë kontrolluar nga BAZG për shkak të sanksioneve të vendosura kundër Rusisë, shkruan srf.ch. Importi i arit rus aktualisht nuk është i ndaluar. Megjithatë, Shoqata e Tregut të Shufrave të arit në Londër, që është i vetmi vend tregtimi i njohur nga Zvicra, ka pezulluar rafineritë ruse për shkak të agresionit të Rusisë ndaj Ukrainës.

Megjithatë, rishikimi i shufrave të arit të importuar në maj dhe qershor nuk ka dhënë ndonjë tregues se ari i importuar në Zvicër është prodhuar pas pezullimit të bërë më 7 mars 2022, sipas BAZG.

Për arsye ligjore nuk mund të jepen informacione konkrete për importuesit e arit në Zvicër.

---