Organizata zvicerane Redog ka shpëtuar 28 veta nga rrënojat

Shpresa për të gjetur dhe shpëtuar më shumë të mbijetuar, tani kur kanë kaluar më shumë se 72 orë pas katastrofës po vjen duke u fundosur

Organizata zvicerane e qenve të shpëtimit Redog deri më tani ka shpëtuar 28 persona të gjallë nga rrënojat pas tërmetit në Turqi, transmeton albinfo.ch.

Duke pasur parasysh shkatërrimin e madh dhe operacionin e vështirë të shpëtimit, ky është një numër i mirë, thonë përfaqësues të kësaj organizate.

Megjithatë, shpresa për të gjetur dhe shpëtuar më shumë të mbijetuar, tani kur kanë kaluar më shumë se 72 orë pas katastrofës shkatërruese po vjen duke u fundosur.

Një përfaqësues i Redog ka thënë sot për agjencinë e lajmeve Keystone-SDA se problemet kryesore për personat që janë ende gjallë nën rrënojat e tërmetit janë mungesa e ujit dhe temperaturat e ulëta.

Redog është e pranishme në Turqi me 22 persona dhe 14 qen, përcjell albinfo.ch. Njëra skuadër po kërkon të mbijetuar me zinxhirin e shpëtimit zviceran në Günyazi, e dyta me organizatën partnere GEA në qytetin jugor turk të Iskenderun në kufirin me Sirinë.

Organizata tjetër zvicerane, ajo Zinxhiri zviceran i shpëtimit është gjithashtu në detyrë. Deri më tani kjo organizatë ka shpëtuar nëntë persona.

---