Pacolli e quan Kosovën “model suksesi për diplomacinë ndërkombëtare”

"Kosova u jep shembull popujve që u kanë përjetuar diskriminimin etnik me eksperiencën e vet në luftën për shtet-formim, për demokraci dhe të drejta njerëzore, me Ibrahim Rugovën, të mbiquajtur Gandi i Evropës"

Nën organizimin e Akademisë Diplomatike nga Ministria e Punëve të Jashtme dhe me mbështetje të Fondacionit gjerman Friedrich Ebert Stiftung, ka nisur punimet konferenca e katërt e Shkollës Diplomatike për diplomatët e rinj.

Ministri i Jashtëm, Behgjet Pacolli ka folur për ndihmën, që vendi i ri dhe i vogël si Kosova mund të ofrojë në diplomacinë ndërkombëtare.

“A mundet Kosova e vogël, të ndihmojë me diçka mendimin diplomatik botëror, eksperiencën e një diplomati? Sado paradoksale të duket si pyetje, unë besoj se të gjithë duhet t’i përgjigjemi me PO. Kosova, u jep shembull popujve që u kanë përjetuar diskriminimin etnik me eksperiencën e vet në luftën për shtet-formim, për demokraci dhe të drejta njerëzore, me Ibrahim Rugovën, të mbiquajtur Gandi i Evropës. Kosova është shembull edhe për tolerancën ndaj pakicave. Pakica serbe ka me Kushtetutën tonë dhe në praktikë, një paket të drejtash, që nuk i ka asnjë pakicë tjetër në botë”, ka vlerësuar Zëvendës-Kryeministri dhe Ministri i Jashtëm, Pacolli.

Në panelin e parë diplomatëve të rinj iu adresuan me fjalën e tyre edhe z. Frank Hantke, Drejtor për Kosovë i fondacionit gjerman Friedrich Ebert Stiftung, pastaj ish-Presidenti i Republikës së Kosovës, Fatmir Sejdiu dhe ish-ministrja për Dialog, Edita Tahiri.