Para gjyqit, shqiptari që vrau shqiptarin tjetër në xhami

Shqiptari 53 vjeçar nga Lugina e Preshevës kishte shtënë me armë nga shpina në shqiptarin tjetër 51 vjeçar derisa ai ishte gjunjëzuar për të kryer ritin fetar mysliman

Para Gjykatës së Qarkut në St. Gallen, nga fundi i muajit maj, një shqiptar nga Lugina e Preshevës  do të përgjigjet për vrasjen e bërë në xhami, të një bashkatdhetari të tij, shkruan tagblatt.ch. Vrasja që kishte ndodhur në gusht të vitit 2014 kishte bërë jehonë të madhe në gjithë Zvicrën për faktin se ishte kryer në një objekt fetar, pra në xhami dhe në praninë e besimtarëve të tjerë.

Shqiptari 53 vjeçar nga Lugina e Preshevës kishte shtënë me armë nga shpina në shqiptarin tjetër 51 vjeçar derisa ai ishte gjunjëzuar për të kryer ritin fetar mysliman, transmeton albinfo.ch. Pra bëhej fjalë për një ekzekutim nga afërsia

Vrasja në xhaminë “El-Hidaije” në Winkeln të St. Gallenit  ishte bërë për hakmarrje, pasi që tashmë i vrari kishte privuar nga jeta para 19 viteve  vëllain e të parit, përcjell albinfo.ch. Gjyqi kishte konstatuar atëbotë se vrasja qe bërë në mbrojtje të domosdoshme.

Policia kishte arrestuar menjëherë vrasësin.

Në rastin aktual, prokuroria kërkon dënim prej 20 vjetësh burg për vrasësin. Ky i fundit ka pranuar veprën.

“Mos u tutni se u kry”

albinfo.ch kishte përcjellë rastin e rëndë duke marrë edhe deklarime nga dëshmitarët dhe nga krerët e xhamisë.

66-vjeçari Gani Berisha nga Prizreni kishte parë me sy vrasjen makabre të bashktadhetarit me origjinë nga Presheva.

“Tmerr i madh me pa një ngjarje të këtillë. Janë raste shumë të rralla të vrasjeve në xhami. Kjo na ka tronditur të gjithëve”, rrëfen për albinfo. ch rastin Berisha.

Besimtarët e mbledhur në panikë kanë braktisur xhaminë “El-Hidaje”, ndërsa autori i vrasjes është dëgjuar duke thënë: “Mos u tutni se u kry”, thonë dëshimtarët.

“Mezi kam dalë nga xhamia, të gjithë ishin frikësuar me të dëgjuar krismat”, thotë për albinfo.ch Berisha.

Plaku Berisha thotë se nuk lejohen vrasjet as me “Kanun” në xhami, duke dyshuar se vrasja ka ndodhur për motive hakmarrjeje.

Duke u bazuar në dëshmitë e të pranishmëve në momentin e vrasjes, albinfo.ch ka raportuar të premten se vrasja dyshohet se kishte ndodhur për motive hakmarrjeje.

“Një 50-vjeçar vrau me 5 plumba një shqiptar po të njëjtës moshë për hakmarrje, ngase ia paska vrarë vëllain”, kishte thënë Burim Berisha për albinfo.ch.

Më tutje Berisha thotë se bëhet fjalë për një ngatërresë familjare që kishte fillet para 20 vjetëve në vendin e tyre të origjinës.

Autori i vrasjes nuk ishte xhematë i rregullt i xhamisë “El Hidaje” në St.Gallen. 

Ai kishte ardhur për të kryer vrasjen nga regjioni i Sargans-it të Zvicrës.