Pas tragjedisë në Graz, shkolla rifillon punën me masa kujdesi për nxënësit

Keystone EPA/ANTONIO BAT

Dy javë pas të shtënave tronditëse që ndodhën në ambientet e shkollës, BORG Dreierschützengasse ka rifilluar sot funksionimin, por me një qasje të ndryshme: pa mësim tradicional, por me aktivitete kujdesi dhe mbështetje emocionale për nxënësit, shkruan Orf, transmeton albinfo.ch.

Në vend të kthimit të zakonshëm në klasa, shkolla ka ofruar programe të posaçme që synojnë një rikthim të butë dhe të sigurt për të rinjtë. Për disa, kjo do të ndodhë në ndërtesën e shkollës. Për të tjerët, janë vendosur gjashtë klasa të përkohshme në kontejnerë të pajisur me ajër të kondicionuar në oborrin e shkollës, si dhe një ambient i veçantë jashtë shkollës që është ofruar nga familja List.

“Askush nuk detyrohet të hyjë në ndërtesën e shkollës,” tha drejtoresha Liane Strohmaier. “Qëllimi ynë është të arrijmë të gjithë nxënësit tanë në dy javët e ardhshme. Nuk ka rëndësi nëse kjo ndodh brenda shkollës apo në një ambient tjetër – e rëndësishme është kontakti.”

Zona që ishte drejtpërdrejt e prekur nga incidenti është mbyllur dhe pritet të ridizajnohet gjatë pushimeve verore. Strohmaier tha se një arkitekt nga stafi do të ndihmojë në transformimin e saj në një hapësirë të re për fillime të reja, transmeton albinfo.ch.

Po ashtu, për ditën e shpërndarjes së dëftesave është planifikuar një ceremoni përkujtimore dhe vend për reflektim. Ndërkohë, shkolla ka marrë mbështetje nga Ministria e Arsimit për mobilim të ri dhe ndihmë psikologjike për nxënësit dhe stafin.

Drejtoresha bëri thirrje për respekt dhe qetësi nga mediat. “Do të ishte e dobishme nëse mbulimi mediatik do të ndalej për pak kohë, të paktën gjatë verës, dhe të rikthehej në vjeshtë për të parë se si po ecim përpara,” tha ajo.

Ajo konfirmoi gjithashtu se shkolla do të mbajë emrin e saj aktual – BORG Dreierschützengasse – si pjesë e identitetit dhe historisë së komunitetit shkollor, transmeton albinfo.ch.