E-Diaspora
Përkujtohet heroi kombëtar Gjergj Kastrioti-Skënderbeu
Të shtunën, më 23 qershor 2018, në Windisch të Kantonit të Aargaut, në simpoziumin kushtuar heroit kombëtar Gjergj Kastriotit – Skënderbeut, ligjëruan profesorë eminentë të Universitetit të Tiranës dhe të Prishtinës
Nën organizimin e Lidhjes së Arsimtarëve dhe Prindërve Shqiptarë „Naim Frashëri“ në Kantonin e Aargaut, u organizua simpoziumi kushtuar figurës së heroit kombëtar „Gjergj Kastriotit – Skënderbeut“, në të cilin me kumtesat e tyre u paraqitën: prof dr. Zymer Neziri, prof. Dr. Teki Kurti, prof. Dr. Frashër Demaj, Dr. Vaxhid Sejdiu dhe Mr. Shaban Arifaj.
Programi u hap me interpretimin e Himnit të Flamurit, nga nxënësja Janina Isufi, kurse mirëseardhje pjesëmarrësve, ju dëshiroj kryetari i Kryesisë Kantonale z. Riza Demaj. Më pastaj pjesëmarrësit i përshëndetën, ambasadori i Republikës së Shqipërisë në Bernë z. Ilir Gjoni dhe ministri – këshilltar i Ambasadës së Republikës së Kosovës z. Mustafë Xhemajli.
Punimet e simpoziumit i udhëhoqi grupi i punës: prof dr. Zymer Neziri (kryetar), prof. Dr. Teki Kurti dhe prof. Dr. Frashër Demaj.
Fjalën e hapjes të simpoziumit e mbajti Prof. Dr. Frashër Demaj, anëtar korrespondent në A.SH.A.K., i cili po ashtu në bazë të rendit alfabetik paraqiti edhe kumtesën e parë me titull: “Atakimi i Gjergj Kastriotit – Skënderbeut, tendencë antishqiptare”. Paraqitja e tij dhe sjellja e fakteve para pjesëmarrësve ishte me shumë interes.
Vlen të veçojmë disa fjali nga kumtesa e prof. Dr. Frashër Demajt: “Tendencat e shfaqura ndaj Skënderbeut, që vijnë nga qarqe radikale, përshkruhen me të pa vërteta, si: luftoi “kundër myslimanëve shqiptarë”, “nënën e kishte sllave”, “ishte serb, bullgar” etj. Asnjë dokument serioz nuk flet për prejardhjen sllave të nënës së Skënderbeut; në kohën e luftërave të Skënderbeut nuk kishte numër të madh të shqiptarëve të besimit islam, islamizimi në masë i shqiptarëve fillon në shekullin XVII; Skënderbeu luftoi kundër Venedikut, Raguzës etj., që ishin të krishterë, luftoi edhe kundër P. Osmane, që ishte islame. Qëllimi i Skënderbeut ishte formimi i një shteti të kohës. Pavarësisht atakimeve nga qarqet e ndryshme antishqiptare, Gjergj Kastrioti – Skënderbeu është figura qendrore e historisë së popullit shqiptar dhe simbol i krijimit të kombit dhe shtetit shqiptar. Prandaj çdo shfaqje jashtë kontekstit shkencor është tendencë antishqiptare”.
Gazetari dhe publicisti MSc. Shaban Arifaj lexoi kumtesën “Gjergj Kastrioti – Skënderbeu në shkrime publicistike – letrare”, i cili ndër të tjerash tha: “Gjergj Kastrioti – Skënderbeu, pas 550 vjetësh nga vdekja e tij, nuk u la asnjëherë në harresë. Ai jo vetëm që ringjallet përherë me vepra e krijime të ndryshme publicistike, historike, letrare, artistike, por gjithmonë mbetet figurë madhore e historisë sonë kombëtare edhe e asaj ndërkombëtare”.
Profesori i Universitetit të Tiranës Prof. Dr. Teki Kurti u paraqit me kumtesën “Gjergj Kastrioti – Skënderbeu, princi i Arbërisë” (Dominus Albania), ku veçoi se:“Gjergj Kastrioti-Skënderbeu ishte trashëgimtar i ligjshëm ndaj dhe quhej Zot i Krujës e i Arbrit. E gjithë epoka, ku Skënderbeu luftoi për bashkimin e popullit dhe për mbrojtjen e lirisë në shtetin e Arbërit, mori emrin dhe lavdinë e tij”.
Mësuesi i shkollës shqipe, Dr. Vaxhid Sejdiu, lexoi kumtesën me titull “Figura e heroit kombëtar Gjergj Kastriotit – Skënderbeut, në tekstet shkollore shqipe”, i cili në mes tjerash tha, se: “Të gjitha studimet e deritanishme për Gjergj Kastriotin – Skënderbeun kanë një konkluzion të përbashkët, se Skënderbeu është hero kombëtar dhe figura më e ndritshme e historisë së përgjithshme të popullit shqiptar. Duke u nisur nga ky fakt, dëshiroj që në këtë punim t`i jap një përgjigje pyetjes se si trajtohet Skënderbeu në tekstet shkollore? Bazë për studim janë tekstet shkollore, për lëndët Gjuhë e letërsi shqipe dhe Histori, kl. V-IX, si dhe kl. I-IV për shkollat e mesme. Librat që janë në përdorim në Shqipëri, në Kosovë, në Maqedoni, në Mal të Zi dhe në Kosovën Lindore (Preshevë…)”.
Prof. Dr. Zymer Neziri, u paraqit me kumtesën“Gjergj Kastrioti – Skënderbeu, në legjenda e gojëdhëna“, duke thënë se: “në këtë kumtesë është shqyrtuar paralindja dhe lindja e Gjergj Kastriotit-Skënderbeut, në fillim të shekullit XV, sipas legjendave e gojëdhënave popullore, të mbarështruara nga Qemal Haxhihasani (1967). Mosha e legjendave për paralindjen e Gjergjit, te Marin Barleti, biograf i tij i shquar, i kalon po ashtu pesë shekuj. Gjatë pesë shekujve të sundimit të Perandorisë Osmane, Gjergj Kastrioti-Skënderbeu, përpos në këngë e tregime, edhe në legjendat e gojëdhënat tona mbeti prijësi më madh i popullit shqiptar, simbol i rrallë i luftës për liri”
Pas kumtesave, edhe diskutimet rreth figurës së Skënderbeut ishin mjaft të dobishme, kurse mbylljen e simpoziumit e bëri pedagogu dhe punëtori i dalluar shkencor, njëherit edhe anëtar nderi i L.A.P.Sh., Prof. Dr. Zymer Neziri
Pas përfundimit të simpoziumit, në shenjë respekti për mysafirët, nxënësit e shkollave shqipe u paraqitën me 3-4 pika muzikore të cilat ishin mjaft mirë të përgatitura. Nxënësit Laura Kastrati dhe Arti Luma kënduan këngën “Ti Shqipëri më jep nder”, Albion Rexha, këngën “Gjuha shqipe” dhe nxënësit e shkollës shqipe të Neuenhof-it, Spreitenbach-ut, Brugg-it dhe Birr-it të përgatitur nga mësuesja e Qefsere Sejdiu, interpretuan kënge kori, edhe atë këngët “Moj Arbëri” dhe “Fryn Murlani me stuhi”.
Dhe në fund pjesëmarrësit ishin të ftuar në një apero të përgatitur nga mbështetësit e shkollës shqipe Linda dhe Visar Muriqi nga Brugi, i Kantonit të Argaut.
Sektori për informim i L.A.P.Sh. “Naim Frashëri” -Argau
Të ngjashme
Të tjera nga E-Diaspora
E-Diaspora
-
Shkëlqimi shqiptar dhe eleganca e kohëve të shkuara në ekspozitën e Kristian Zefit Në këtë ekspozitë, në Rothrist (Aargau) do të paraqiten instrumenta tradicionale, artefakte etnografike dhe kostume të...
-
SH.K.A “Dardania” përfaqëson Shqipërinë e Kosovën në Festivalin në Winterthur
-
Adoleshenti kosovar, i dyshuar për ISIS, e quan veten “Bombarduesi”
-
Nju-Jork: Artisti Petrit Halilaj, në majë të Muzeut Metropolitan
-
Marigona Qerkezi do të debutojë në teatrin e St.Gallenit