Personalitete të ndryshme reagojnë pas dorëheqjes së kryeministres May

Kryeministria e Britanisë së Madhe, Theresa May, në njërin nga fjalimet e saj më të rëndësishme që e dha gjatë ditës së sotme paralajmëroi edhe dorëheqjen e saj.

Por kjo dorëheqje u përcoll me shumë reagime nga ana e personaliteteve të ndryshme.

Komisioni Evropian e ka cilësuar se dorëheqja e kryeministres May nuk ndryshon asgjë në pozicionin e të 27-tëve për marrëveshjen e arritur për largimin e Britanisë së Madhe nga Bashkimi Evropian.

‘’Ne do të respektojmë kryeministrin e ri, por asgjë nuk do të ndryshojë në qëndrimin e miratuar nga Këshilli Europian për marrëveshjen e largimit’’, deklaroi sot ndihmës zëdhënësja e Komisionit Europian, Mina Andreeva.

Kancelarja gjermane, Angela Merkel, ka thënë se e respekton vendimin e May, pas dështimit të miratimit të planit për tërheqjen e Britanisë së Madhe nga Bashkimi Evropian.

“Qeveria gjermane kërkon të ruajë bashkëpunimin e ngushtë me qeverinë britanike, po njësoj, pa asnjë ndryshim’’.

Edhe lideri i partisë Brexit e komentoi dorëheqjen e May.

‘’Dy liderë konservatorë me qëndrime pro-BE janë larguar deri më sot. Ose partia të nxjerrë mësime ose të shpërbëhet’’, tha Nigel Farage

Ish- ministri i Jashtëm britanik, Boris Johnson, ka thënë se “erdhi koha për të vënë në zbatim Brexit-in”.

Në anën tjetër, edhe Partia Konservatore ka dhënë një koment.

”Pasuesi i kryeministres May do të emërohet deri më 20 korrik”, njoftoi Partia Konservatore me anë të një njoftimi.