Plazhet publike në Shqipëri, të stërmbushura

Foto: Edi Rama-FB

Kritikat e drejtuara së fundmi drejt Shqipërisë për rritje të çmimeve të turizmit ka aktivizuar kryeministrin e këtij vendi, Edi Rama, i cili mes tjerash u ka kërkuar bizneseve të mos abuzojnë me çmimet. Megjithatë, ai ka paraqitur pamje edhe të plazheve publike, të cilat mund të shfrytëzohen pa pagesë nga pushuesit.

Në fotot e publikuara nga ai, një nga plazhet publike të Himarës shihet i stërmbushur nga turistët.

“Këtë sezon pastërtie shembullore në vijën bregdetare, janë garantuar më në fund edhe hapësirat e plazheve publike. Ky është një nga plazhet publike të Himarës, i cili administrohet e mirëmbahet nga bashkia pa asnjë pagesë për turistët”, thekson Rama në një postim në rrjetet sociale.

Gjatë sezonit veror plazhet publike janë të qasshme dhe të pastra. Ndërkohë autoritetet qendrore dhe vendore vijojnë punën për mbajtjen pastër të plazheve, sidomos në stacionet publike dhe zonat e ndërmjetme mes stacioneve të menaxhuara nga biznesi privat.