Policët e korruptuar dalin para gjykatës

Në aktakuzë thuhet se këta të dyshuar kanë marrë nga qytetarët mjete materiale në shumë prej 10 e deri në 200 euro

20 ish-pjesëtarë të Policisë së Kosovës nga Rajoni i Mitrovicës janë ulur në karrigen e të akuzuarve në Gjykatën Themelore të Mitrovicës dega në Vushtrri.

Ata dyshohet se në muajt e fundit të vitit 2016, në bashkërendim mes vete, kanë kryer vepër penale “marrje ryshfeti” gjatë orarit të punës. Në aktakuzë thuhet se këta të dyshuar kanë marrë nga qytetarët mjete materiale në shumë prej 10 e deri në 200 euro. Të gjithë të pandehurit janë deklaruar të pafajshëm, përcjell albinfo.ch.

Gjyqtari Avdi Mehmeti ka thënë se të dyshuarit për korrupsion, oficerët policorë po gjykohen në dy grupe dhe lëndët janë të ndara, për shkak të kushteve dhe numrit të madh të akuzuarve. Të akuzuar për dyshime “marrje ryshfeti” janë 59 ish-pjesëtarë të policisë derisa një pjesë e tyre janë edhe nga rajoni i Prizrenit.