Policia zvicerane përgatit ‘kurthin’ për vozitësit e huaj

Disa shoferë të huaj të makinave, janë bashkuar miqësisht me veturat e tyre të llojit dhe ngjyrës së njëjtë, duke shkelur disa herë Ligjin zviceran të komunikacionit

Foto: 20 min

Një francez i moshës 20-vjeçare është dënuar të premten pasi kishte vozitur me shpejtësi prej 195 km/h në Bovernier të Valisit, në një pjesë të rrugës ku shpejtësia maksimale ka qenë e limituar në 80 km/h. Përpos tij, u gjobitën edhe disa vozitës të tjerë të cilët ishin pjesë e grupit.

Policia Kantonale e Valisit, paraprakisht ka qenë e informuar për kalimin e dhjetëra veturave sportive, të të njëjtit lloj dhe ngjyrë, kanë thënë nga policia gjatë fundjavës, përcjell Albinfo.ch.

Me këtë rast, ajo ka vendosur radar në relacionin në mes Grand-St-Bernard dhe Forclaz.

Rreth orës 11:30, Në Bovernier, në një pjesë të rrugës të limituar në 80 km/h, dy vozitësit e parë u regjistruan me shpejtësi prej 124 km/h, gjegjësisht 125 km/h. Menjëherë pas kësaj, një vozitësi i tretë është regjistruar me shpejtësi prej 195 km / h, duke llogaritur edhe tolerancën (5 km/h).

Me vendim të Prokurorisë, vozitësi 20-vjeçar është dashur të paguajë një garanci të gjobës prej 3.500 frangash, të shoqëruar me një ndalesë të vozitjes në Zvicër, për një periudhë të pacaktuar.

Stacioni policor i Policisë Kantonale ka regjistruar edhe shumë thirrje që informonin për sjelljen e pahijshme të disa anëtarëve të kësaj miqësie.

Gjatë pasdites, rreth njëzet pjesëmarrës u arrestuan dhe u denoncuan për shpejtësi të tejkaluar dhe parakalim të paligjshme në aksin e Forclaz.

Të gjithë shkelësit e ligjit janë shtetas të huaj dhe automjetet e tyre kanë qenë të regjistruara jashtë vendit.