Posta shuan 250 vende pune

Posta njoftoi se do të shuajë 250 vende të punës me kohë të plotë deri në vitin 2014 në fushën e logjistikës së mallrave dhe magazinimit.

Posta, ose i ashtuquajturi “gjigandi i verdhë”, ka njoftuar se ky reduktim i stafit do të jetë aq sa është e mundur me personat që janë në fund të aktivetit të tyre ( të tillë afër pensionimit). Nëse largimi nga puna bëhet i pashmangshëm, një plan social është negociuar me sindikatat, thonë përfaqësuesit e saj. “Punonjësit e prekur do të gëzojnë një mbështetje për të gjetur punë brenda apo jashtë Postës”.

Posta justifikon këtë ristrukturim duke rikujtuar faktin se konkurrenca po bëhet gjithnjë e më “internacionale dhe agresive”, sidomos në sektorin e stokëve dhe shpërndarjes të mallrave. Prandaj, riorganizimi logjistik i Postës është i nevojshëm për të mbajtur një “raport çmim-performancë” të kënaqshëm. Masat zbatuese do të zgjasin dy vjet dhe do të konkretizohen me faza.