Presidenti i Zvicrës Guy Parmelin pritet nga presidentja Siljanovska-Davkova

Vizitë zyrtare e Presidentit zviceran Guy Parmelin në Maqedoninë e Veriut, në fokus integrimi evropian dhe bashkëpunimi ekonomik

Presidenti i Zvicrës Guy Parmelin po zhvillon një vizitë zyrtare në Maqedoninë e Veriut, ku u prit me nderime të larta shtetërore dhe ushtarake nga presidentja Gordana Siljanovska-Davkova, përcjell albinfo.ch.

Pas ceremonisë zyrtare të pritjes, dy presidentët zhvilluan një takim “tet-a-tet”, i cili u pasua nga një mbledhje plenare e delegacioneve përkatëse. Në qendër të bisedimeve ishin marrëdhëniet dypalëshe, forcimi i bashkëpunimit ekonomik si dhe procesi i integrimit evropian të Maqedonisë së Veriut.

Presidentja Siljanovska-Davkova shprehu mirënjohje për mbështetjen e vazhdueshme të Zvicrës në procesin e afrimit me Bashkimin Evropian, si dhe për kontributet në fusha kyçe si sundimi i ligjit, forcimi i institucioneve demokratike dhe mbrojtja e burimeve natyrore. Ajo theksoi rëndësinë e kritereve të Kopenhagës, duke nënvizuar se vendi i saj është gjeografikisht, historikisht dhe kulturalisht pjesë e Evropës dhe meriton trajtim të barabartë në procesin e integrimit.

“Ajo që kërkojmë është të përqendrohemi në reformat dhe të mos humbim energjinë në çështje joracionale,” u shpreh presidentja.

Nga ana e tij, presidenti zviceran Guy Parmelin theksoi se vizita ka në fokus edhe thellimin e bashkëpunimit ekonomik dhe përmirësimin e kushteve për shkëmbime tregtare. Ai vlerësoi rëndësinë e sundimit të ligjit, funksionimit efikas të institucioneve dhe stabilitetit politik si parakushte për zhvillim të qëndrueshëm.

“Zvicra i kushton rëndësi të madhe paqes dhe stabilitetit në Ballkanin Perëndimor. Integrimi evropian mbetet faktor kyç për paqen dhe prosperitetin e rajonit,” deklaroi Parmelin.

Gjatë vizitës, presidenti zviceran u takua edhe me kryetarin e Kuvendit Afrim Gashi, si dhe me kryeministrin Hristijan Mickoski. Në vijim të agjendës u zhvillua edhe një takim mes përfaqësuesve të biznesit nga Zvicra dhe Maqedonia e Veriut, me qëllim forcimin e bashkëpunimit ekonomik mes dy vendeve./Albinfo.ch

---