Presidentja Osmani priti komandantin e Forcave të Përbashkëta të NATO-s në Napoli

Presidentja e Republikës së Kosovës, Vjosa Osmani, priti sot në takim Admiralin George M. Wikoff, Komandantin e Komandës së Forcave të Përbashkëta të NATO-s në Napoli, me rastin e marrjes së detyrës së tij në krye të një prej komandave më të rëndësishme strategjike të Aleancës Veriatlantike.

Gjatë takimit, Presidentja Osmani e uroi Admiralin Wikoff për detyrën e re dhe i dëshiroi suksese në udhëheqjen e komandës, duke theksuar rëndësinë e rolit të saj për sigurinë euroatlantike, stabilitetin rajonal dhe paqen ndërkombëtare.

Presidentja gjithashtu ritheksoi mirënjohjen e Kosovës ndaj NATO-s dhe Shteteve të Bashkuara për kontributin e tyre të vazhdueshëm në sigurimin e paqes dhe stabilitetit që nga viti 1999. Ajo vlerësoi në veçanti misionin e KFOR-it, duke e cilësuar si forcë të besueshme parandaluese dhe garantuese të sigurisë për të gjithë qytetarët, pa dallim.

Në këtë kontekst, Presidentja Osmani konfirmoi përkushtimin e Kosovës për vazhdimin e bashkëpunimit me KFOR-in dhe theksoi se vendi mbetet një partner i besueshëm dhe kontribuues për sigurinë dhe stabilitetin rajonal, i përkushtuar ndaj vlerave të paqes, demokracisë dhe sundimit të ligjit.

Presidentja gjithashtu potencoi rreziqet nga aktet destabilizuese të Serbisë dhe mungesën e llogaridhënies për sulmin ndaj ushtarëve të KFOR-it në Banjskë dhe sulmin kinetik në kanalin Ibër-Lepenc.