Prodhimi industrial në BE shënoi rënie prej 8 për qind

Keystone

Prodhimi industrial në Bashkimin Evropian (BE) u ul me 8 për qind në vitin 2020, krahasuar me vitin e mëparshëm për shkak të pandemisë COVID-19.

Sipas Zyrës evropiane të Statistikave, prodhimi industrial në Eurozonën me 19 anëtarë u ul me 1.6 për qind në dhjetor krahasuar me nëntorin dhe me 0.8 për qind krahasuar me të njëjtën periudhë të një viti më parë.

Gjithashtu, ky prodhim në BE u ul me 1.2 për qind në muajin dhjetor 2020 krahasuar me muajin nëntor 2020 dhe 0.4 për qind krahasuar me të njëjtën periudhë të vitit 2019.

Nga ana tjetër, krahasuar me një vit më parë, mesatarja e prodhimit industrial të vitit 2020 u ul me 8 për qind në BE dhe 8.7 për qind në Eurozonë.

Midis vendeve të BE-së, rritjet më të larta mujore të prodhimit industrial në muajin dhjetor 2020 u regjistruan në Danimarkë me 2.4 për qind, Portugali me 1.8 për qind dhe Luksemburg dhe Estoni me 1.6 për qind.

Ndërkaq, rënia më e lartë në prodhimin industrial në muajin dhjetor 2020 u regjistrua në Hungari me 2.5 për qind, Belgjikë me 1.9 për qind dhe në Finlandë me 0.9 për qind, raporton Telegrafi, përcjell Albinfo.ch.