Prokurorët austriakë kërkojnë t’i hiqet imuniteti fituesit të zgjedhjeve, Herbert Kickl

Prokurorët austriakë kanë kërkuar nga Kuvendi i Austrisë që t’ia heqë imunitetin Herbert Kickl-it, kryetar i partisë fituese në zgjedhjet e shtatorit, Partia e Lirisë – FPO, nën dyshimin se ka dhënë dëshmi të rreme në një komision parlamentar, konfirmoi të enjten zyra e kryetarit të Dhomës së Ulët të Kuvendit.

Revista “Profil” raportoi më herët të enjten se Zyra për Krime Ekonomike dhe Korrupsion i kishte dërguar një kërkesë zyrës së kryetarit të Dhomës së Ulët të Kuvendit, Walter Rosenkranz, që vjen nga partia fituese, raporton agjencia e lajmeve “Reuters”.

Revista “Profil” tha se kërkesa erdhi pas një deklarate dërguar prokurorëve nga Andreas Hanger, që atëherë ishte ligjvënës nga Partia Popullore e kancelarit Karl Nehammer, duke pretenduar se Kickl kishte gënjyer për një varg çështjesh, përfshirë reklamat në mediat e shtypura që janë paguar nga Partia e Lirisë (FPO).

“Unë mund të konfirmoj se kërkesa është pranuar nga Kuvendi”, tha një zëdhënës i Rosenkranzit, duke refuzuar që të komentonte më shumë.

Një zëdhënës i partisë FPO e drejtoi agjencinë “Reuters” te një raport nga agjencia e lajmeve APA, ku citohet një deklaratë e partisë parlamentare të ketë thënë se Kickl e ka thënë të vërtetën në dëshminë e tij në prill.

Zyra për Krime Ekonomike dhe Korrupsion nuk mund të fillojë hetim pa u hequr imuniteti parlamentari Kickl-it si ligjvënës. Një zëdhënës i kësaj zyre tha se ajo nuk ishte duke e hetuar kreun e FPO-së.

FPO-ja doli e para në zgjedhjet parlamentare të shtatorit me rreth 29 për qind të votave dhe tani ka më së shumti ulëse në Kuvend. Pasi një partie i nevojiten shumica e ulëseve për të qeverisur dhe asnjë parti nuk është e gatshme që të qeverisë me FPO-në, tri parti të tjera tani janë në bisedime për një koalicion të mundshëm.

Kryetari i Dhomës së Ulët të Kuvendit tani duhet ta dorëzojë kërkesën për heqjen e imunitetit të kryetarit të FPO-së te komisioni parlamentar për imunitete, i cili pastaj do të hartojë njëraport para se Dhoma e Ulët të vendosë nëse imuniteti i Kickl-it duhet të hiqet.