Prokurorja kërkon gjobë maksimale për Credit Suisse

(KEYSTONE/Peter Klaunzer)

Zyra e Prokurorit të Përgjithshëm të Zvicrës ka kërkuar që Credit Suisse të gjobitet me 5 milionë CHF – maksimumi i parashikuar me ligj – për pastrim të rëndë parash dhe mbështetje të një organizate kriminale, shkruan swissinfo.ch, përcjell albinfo.ch.

Banka e dytë më e madhe e Zvicrës është e pandehur në një gjyq, që filloi më 7 shkurt, që përfshinte miliona euro që dyshohet se ishin pastruar në arkat e saj nga trafikanti bullgar i drogës, Evelin Banev.

Të mërkurën, prokurorja Alice de Chambrier denoncoi mangësitë organizative të bankës në luftën kundër pastrimit të parave. Të gjitha muret mbrojtëse – këshilltari i klientit, eprorët e saj dhe departamenti i rrezikut – kishin dështuar, tha ajo. Duke qenë se nuk kishte rrethana lehtësuese, de Chambrier kërkoi gjobën maksimale prej 5 milionë CHF, përcjell tutje albinfo.ch.