Proteston Vetëvendosje, 62 të arrestuar

Vetëvendosje raporton për 62 protestues të arrestuar, në mesin e tyre edhe deputetja nga radhët e kësaj lëvizje, Albana Gashi

Dhjetëra aktivistë të Lëvizjes Vetëvendosje janë arrestuar të mërkurën në një protestë kundër nënshkrimit të marrëveshjes për privatizimin e Distribucionit për Furnizim me Energji elektrike.

Në mesin e aktivistëve të arrestuar, siç thuhet në një njoftim të Vetëvendosjes, janë edhe disa deputete të Kuvendit të Kosovës.

Aktivistët e Vetëvendosjes së bashku me përfaqësues të sindikatave të pavarura, janë mbledhur para dyerve të Qeverisë së Kosovës duke kërkuar ndërprerjen e privatizimit.

Protesta u organizua në kohën kur pritej nënshkrimi për privatizimit të Distribucionit të KEK-ut ndërmjet Qeverisë dhe kompanisë Turke Lima&Çalik.

Sipas Vetëvendosjes, protestuesit janë sulmuar nga Policia e Kosovës, ndërsa raportohet për tre protestues të lënduar.

Lëvizja Vetëvendosje raporton për 62 protestues të arrestuar, në mesin e tyre edhe deputetja e Kuvendit të Kosovës nga radhët e kësaj lëvizje, Albana Gashi. Polica e Kosovës akoma nuk është deklaruar për këtë protestë.

Nënkryetari i Lëvizjes Vetëvendosje, Shpend Ahmeti e ka quajtur të paskrupullt vendimin e qeverisë për privatizimin e Distribucionit të KEK0ut në vlerën 26 milionë euro. “Sot është falur Distribucioni i KEK-ut. Është një prej hajnive më të mëdha që është bërë. 26 milionë euro bëjnë dy kilometra e gjysmë asfalt”, tha ai.

Ndryshe çështja e privatizimit të KEK-ut, por edhe protesta e të mërkurës ka qenë objekt debati në Kuvendin e Kosovës.