AUTOTECH

Pse kanë rënë shitjet e Mercedes-it

Prodhuesi i Mercedes-it, Daimler, deklaroi se objektivat financiarë janë bërë më të vështira për t’u arritur, duke sjellë lajme të këqija për industrinë automobilistike.

Fitimi i prodhuesit gjerman ra me 16%, prej rënies së shitjeve dhe rritjes së kostove të zhvillimit të modeleve të reja.

Ndërkohë që të ardhurat rezultuan brenda projeksioneve të analistëve, kreu ekzekutiv Dieter Zetsche tha se tremujori i parë dështoi të arrijë parashikimet e kompanisë.

Daimer, ashtu si dhe prodhuesit e tjerë të makinave, po përballet me shitje të ulëta në SHBA dhe Evropë, paralelisht me rritjen e mëdha të shpenzimeve për krijimin e modeleve elektrike.

Gjatë javës, Renault raportoi gjithashtu një rënie me 5% të të ardhurave, ndërsa Nissan tha se nuk do të arrijë objektivat vjetore, transmeton ‘Scan’.

Prodhuesi më i madh në botë i makinave luksoze dhe kamionëve të mëdhenj, pret ende që të ardhurat përpara interesave dhe taksave të rriten lehtë këtë vit. Aksionet e Daimler-it ranë me 1.1%, në 57.5 euro në nisje të tregtisë, përcjell albinfo.ch.

Megjithatë, aksionet e kompanisë janë rritur me 25% që prej fillimit të vitit, duke tejkaluar rivalët gjermanë si BMW dhe Volkswagen.