PZAP certifikon Listën Serbe për zgjedhjet e 28 dhjetorit

Keystone (AP Photo/Visar Kryeziu)

Paneli Zgjedhor për Ankesa dhe Parashtresa në Kosovë e ka ndryshuar vendimin e Komisionit Qendror të Zgjedhjeve dhe e ka certifikuar Listën Serbe për zgjedhjen e parakohshme të 28 dhjetorit.

Sipas vendimit të 2 dhjetorit, KQZ-ja nuk e kishte certifikuar Listën Serbe për zgjedhjet e parakohshme teksa në vendimin e publikuar më 5 dhjetor, PZAP-ja ka thënë se vendimi i KQZ-së është i paligjshëm dhe jokushtetues, transmeton albinfo.ch.

“Vendimi i KQZ-së është në kundërshtim me nenet 31 dhe 45 të Kushtetues, si dhe në kundërshtim me nenet 16, 17, 26, 27 dhe 30 të Ligjit për Zgjedhjet e Përgjithshme. Urdhërohet KQZ-ja ta konfirmojë subjektin politik Lista Serbe në përputhje me Ligjin për Zgjedhjet e Përgjithshme”, thuhet në vendimin e PZAP-së.