Qeveria e Austrisë diskuton për ruajtjen e gazit

unsplash

Këtë të martë Qeveria federale austriake do të takohet për të diskutuar situatën aktuale të ruajtjes së gazit dhe se si do të vazhdojë. Pas kësaj, vendi mund të ecë përpara dhe të shpallë një “fazë të dytë” të emergjencës së gazit, raportoi Die Presse, përcjell albinfo.at.

Faza e dytë e emergjencës së gazit në Austri njihet si “niveli i alarmit”, kur bizneset inkurajohen të përdorin alternativa ndaj gazit natyror sa herë që është e mundur. Vendi shumë i varur nga gazi është aktualisht në “nivelin e paralajmërimit të hershëm”, kur ka një tregues konkret dhe të besueshëm se furnizimi me gaz mund të përkeqësohet.

Objektet e depozitimit të gazit në Austri janë mbushur me 46 për qind. Nëse Rusia ndalon dërgimin e gazit nga viti i ardhshëm – siç mendohet tani – rezervat do të zgjasin deri në fund të vitit 2023.

Qëllimi është mbushja e rezervuarëve në 80 për qind deri në fillim të sezonit të ngrohjes në vjeshtë.