Qeveria zvicerane mbështet projektin për ujë të pijes në 6 komuna të Kosovës

Ministria e Zhvillimit Ekonomik dhe Zyra zvicerane për Bashkëpunim nënshkruan marrëveshjen “Programi i mbështetjes për ujë dhe sanitacion në zonat rurale, faza IV”, e cila pritet t’ua zgjidhë problemin me ujë të pijes 26 fshatrave në gjashtë komuna të Kosovës.

Nga kjo marrëveshje në vlerë rreth 2 milionë e 700 mijë euro, pritet të përfitojnë komunat Ferizaj, Gjilan, Suharekë, Viti, Kamenicë dhe Ranillug, ku fshatrat përfituese të tyre kanë mbi 50 mijë banorë.

Ministri i Zhvillimit Ekonomik, Besim Beqaj, duke e falënderuar Zyrën zvicerane për këtë mbështetje, ka thënë se ky projekt ka për qëllim përmirësimin e ujit të pijes dhe në përgjithësi jetën e qytetarëve.

Ky projekt, sipas tij, synon përmirësimin e shëndetit, por njëkohësisht edhe përmirësimin e kushteve urbane për të cilat kanë nevojë të gjitha zonat rurale.

Kurse, përfaqësuesi i Zyrën Mbështetëse zvicerane në Kosovë, Markus Bechler, ka deklaruar se qeveria e shtetit të tij e ka pasur si qëllim investimin në Kosovën juglindore, por ajo ndërkohë e ka zgjeruar hapësirën gjeografike për investime.

Programi përbëhet nga katër komponentë, të cilat kanë të bëjnë me qasjen më të madhe në ujë të pijes të zonave rurale, ngritjen e kapaciteteve, përkrahjen e kompanive të ujit dhe ngritja e kapaciteteve institucionale.