Rama kërkon unitet nga Ahmeti dhe Thaçi

Në takimin e shtatë të Këshillit të Stabilizim-Asocimit, Shqipëri-BE që është mbajtur sot në Bruksel, kryeministri Rama ka bërë apel për unitet në mes të faktorit politik shqiptar në Maqedoni.

Delegacioni shqiptar në këtë takim përfaqësohet nga ministrja e Integrimit, Klajda Gjosha, ministri i Jashtëm, Ditmir Bushati, dhe kryetarja e Komisionit të Integrimit, Majlinda Bregu.

Ministri Bushati, pas përfundimit të këtij takimi, ka folur edhe sa i takon ngjarjeve në Kumanovë si dhe takimin me dy liderët e partive politike shqiptare në Maqedoni. Bushati tha se në këtë takim, ku ishte dhe kryeministri Edi Rama, iu është bërë thirrje liderëve politikë shqiptarë të Maqedonisë të jenë më të bashkuar, raporton “Shqiptarja”.

Bushati bëri thirrje edhe njëherë nga Brukseli që të respektohet marrëveshja e Ohrit dhe se shteti shqiptar e dënon dhunën e ushtruar në Kumanovë.

Ai tha se Maqedonia aktualisht ka një problem të brendshëm dhe kjo nuk është çështje e Shqipërisë.

Sipas Bushatit, Shqipëria është e interesuar që të shohë një Maqedoni që ka një shtet të fortë dhe pa konflikte pasi kjo ndikon në mënyrë direkte në stabilitetin e rajonit gjë të cilën Shqipëria nuk do që ta cenojë.

Ndërkohë sa i përket tensioneve me Greqinë për ujërat detarë, Bushati tha se kjo është një e drejtë ndërkombëtare e Shqipërisë.