Rama rreth protestës së demokratëve: Dje pamë shfaqje mesjetare

Përplasjet e djeshme të demokratëve në Shqipëri, të cilët po ‘luftojnë’ për të marrë nën kontroll partinë, kanë nxitur reagimin e kundërshtarit të tyre politik, kreut të PS-së, njëherësh kryeministrit Edi Rama.

Ky i fundit, përmes një adresimi në Facebook e quajti “shfaqje mesjetare” sulmin ndaj selisë së Partisë Demokratike, duke thënë se ngjarja e djeshme mund të “kishte degjeneruar në gjakderdhje”.

“Mund të kishte degjeneruar në diçka të pangushëllueshme për PD-në, për demokratët, por edhe për të gjithë shoqërinë. Si njëri, si tjetri (Basha dhe Berisha), të dyja kufomat politike kanë marrë peng atë parti në kacafytjen e tyre, për fat të keq ishin papërgjegjshmërisht të gatshëm ta luanin deri në fund lojën e mbrojtjes apo marrjes së kështjellës me gjakun e demokratëve”, u shpreh Rama, transmeton Albinfo.ch.

Sipas Ramës, këto ngjarje ekstreme dëmtojnë institucionet demokratike të vendit.

“Një zhvillim i kësaj natyre që patjetër e dobëson kundërshtarin politik, në fakt godet vendin. Godet shoqërinë, godet të gjithë ngrehinën e kulturës politike, e cila për të gjitha arsyet që dimë për shkak të historisë e traditës jo dhe aq bujare të shqiptarëve në raport me institucionet dhe shtetformimin përbën realisht problem. Kjo kulturë politike dje ka marrë një goditje të tmerrshme”, u shpreh kryeministri.