Lajme

Raportohet se SHBA dhe Irani janë shumë pranë marrëveshjes historike

E premte, 22 Maj 2026 - 17:00 albinfo.ch
Keystone EPA/ABEDIN TAHERKENAREH

Shtetet e Bashkuara të Amerikës dhe Irani mund të jenë shumë pranë një marrëveshjeje të rëndësishme diplomatike, e cila sipas raportimeve të Al Arabiya pritet të shpallet brenda disa orëve të ardhshme.

Sipas këtyre raportimeve që citojnë burime diplomatike, drafti përfundimtar i marrëveshjes është ndërmjetësuar nga Pakistani dhe përfshin disa pika kyçe që synojnë uljen e tensioneve në rajon dhe rikthimin e stabilitetit në Lindjen e Mesme.

Bëhet e ditur se marrëveshja parashikon një armëpushim të menjëhershëm mes palëve, si dhe garantimin e lirisë së lundrimit në Ngushticën e Hormuzit, një nga rrugët më strategjike për transportin global të naftës, transmeton albinfo.ch.

Një tjetër element i rëndësishëm i draftit është heqja graduale e sanksioneve amerikane ndaj Iranit, çka konsiderohet si një hap i madh drejt normalizimit të marrëdhënieve mes dy vendeve pas viteve të gjata tensionesh politike dhe ekonomike.

Marrëveshja pritet të hyjë në fuqi menjëherë pas shpalljes zyrtare nga të dyja palët.

 Të tjera nga Lajme

Sulmuan një turist në Locarno, katër të arrestuar

 E-Diaspora

 Jeta në Zvicër